Әзербайжан елшісімен кездесті

Кеше Қазақстан Республикасы Орталық сайлау комиссиясының төрағасы Қ.Тұрғанқұлов Әзербайжан Республикасының Қазақстандағы Төтенше және өкілетті елшісі Р.Маммадовпен кездесті. Ортсайлауком басшысы Мам­мадовты 2016 жылғы 25 қаңтарда Қазақстан Республикасындағы Әзербайжан Республикасының елшісі қызметіне кіріскенімен құт­тықтады және оны Парла­мент Мәжілісінің және мәсли­хат­тарының депутаттарын сайлау жөніндегі сайлау науқанының барысымен таныстырды. «20 ақпаннан партиялық тізімдері тіркелген алты саяси партия үшін электораттық науқанның негізгі кезең­дерінің бірі – сайлауалды үгіт баста­лады. Сондай-ақ, 20 ақпаннан Қазақ­стан халқы Ассамблеясы сайлайтын Қазақстан Республикасы Парламенті Мәжілісінің депу­тат­тығына кандидаттарды ұсыну да басталады», – деді Қ. Тұрғанқұлов. Ортсайлауком мүшесі Т. Ох­лоп­кова кездесуге қатысушыларды Қазақстан халқы Ассамблеясынан сайланатын Парламент Мә­жі­лісінің 9 депутатын сайлаудың ерекшеліктерімен таныстырды. Ал Р. Маммадов Қазақстан мен Әзербайжанды табысты ынтымақтастық байланыстыратынын, оның ішінде біздің елдердегі сайлау үдерісін байқауды ұйымдастырудағы тәжірибе алмасудың маңыздылығына назар аударды. Сонымен бірге, ол дипломатиялық корпустың ағымдағы парламенттік сайлауға мониторинг жүргізуге халықаралық байқаушылар ретінде қатысатыны туралы ақпараттандырды және Қазақстан Республикасында сайлау әдетте демократиялық жағдайда өтетінін атап өтті. Әлисұлтан ҚҰЛАНБАЙ, «Егемен Қазақстан».