Қостанайда көктайғақтың салдарынан 35 адам түрлі жарақат алды

ҚОСТАНАЙ. 23 ақпан. Қостанайда жауған жаңбырдан кейін айнадай көктайғақ болып тұр. Бұл туралы egemen.kz тілшісі хабарлады. Көктайғақ түске қарай жауған жаңбырдан кейін күшейіп кетті. Ауылда да, қалада да көшелер а йнадай, көліктің де, жүргіншілердің де  қозғалысы қиындап кетті. Қостанай қалалық және аудандардағы оқу бөлімі екінші ауысымда оқитын оқушыларды сабақтан босатуға мәжбүр болды. Күндізгі сағат 12:00-ден кейін Қостанай қаласында автобустардың жүрісі тым сиреп кетті, автопарктер жолаушы автобустарының интервалын көктайғаққа байланысты созып отыр. «Көктайғақ жылы ауа ағысына байланысты жауған жаңбырдан кейін оқыс қалыптасты. Түнде тағы да жаңбыр аралас қар жауады, ертең жауын-шашын болмайды. Бірақ ертең ауаның температурасы сынап бағанасынан сәл көтерілсе де көктайғақ сақталады», – деді «Қазгидромет» Қостанай бөлімшесінің кезекші синоптигі Татьяна Косенко. Қостанай қалалық ауруханасы жанындағы травматология бекетіне түстен кейін көмек сұрап келгендердің қатары жиілеп кеткен. «Бүгін сағат 15:00-ге дейін 35 адам түрлі жарақатпен келді. Бірақ әзірге айтарлықтай ешнәрсе болған жоқ. Түстен кейін келушілердің қатары жиілей түскенін айтуға тиіспін», – деді кезекші травматолог дәрігер. Нәзира Жәрімбетова. Дерек: egemen.kz. Сурет: ng.kz.