Жігіт деп осыны айт!

Бүгінгі күннің батыры деуге лайықты жанның бірі – Қуаныш Берденов Доссор кентінде тұрады. Осындағы мәдениет үйінде жұмыс жасайтын ол өткен аптада әлдебір шаруасымен орталық базарға беттепті. Іргесі ерте қалан­ған кенттің тар көшесінде қарсы жолыққан әжейдің: «Балам-ай, әнебір пәтер өртеніп жатыр-ау», – деген оқыс даусын естіп, соған қарай тұра жүгіргенін өзі де аң­ғармай қалыпты. Жанұшыра жеткен бойда пәтердің есігін аша алмай әуреленіп, ақыры терезесін сындыра ішке кіруге ұмтылады. Сөйтсе, қою түтіннен ештеңе көрінбейтін пәтердің ішінде үш бала қалыпты. «Сол сәт ештеңені ойлауға мұрша болмады. Бар ойым – іштегі балаларды құтқару», – деп еске алады Қуаныш Берденов. Көзді ашып-жұмғандай қас-қағым мезетте қызыл жалынның ортасынан құтқарылған үш баланың кішкентайы әлі мектеп жасына жетпеген екен. Үлкені – 7, ортаншысы – 5, ал кішкентайы 3 жасқа толыпты. Бұл балдырғандардың көрер жарығы бар екен. Қуаныш оларды тысқа алып шыққан сәтте өрт одан сайын үдеп, электр сымдары жана бастапты. – Менің орнымда болған кез келген азамат балаларды құтқаруға ұмтылар еді. Қиналғанға қол ұшын созу қанымызда бар қасиет, тіпті, азаматтық парызымыз болуы қажет, – дейді бейбіт күнде өз өмірін қауіп-қатерге тігіп, өрттен үш баланы құтқарған Қуаныш Берденов. Жолдасбек ШӨПЕҒҰЛ, «Егемен Қазақстан». Атырау облысы.