Алатау баурайындағы алғыс айту

Алматыдағы Достық үйінде Алғыс айту күніне орай түрлі этномәдени бірлестік өкілдерінің қатысуымен «Менің Отаным – Қазақстан!» атты мерекелік фес­тиваль болып өтті. Қала тұрғындары мен қонақ­тарына шат-шадыман көңіл-күй сыйлаған шара елімізді мекен еткен түрлі ұлт өкілдері ұйымдастырған мерекелік концертпен басталып, онда орыс, украин, әзербайжан, грузин және тағы басқа ұлт өкілдері қазақтың ұлттық әндерін шыр­қап, биін биледі. Қазақстан Республикасы Президенті жанындағы «Қо­ғамдық келісім» рес­пуб­лика­лық мем­лекеттік мекемесі мен қала әкімдігі, Алматы қа­лалық Қазақстан халқы Ассамблеясы хатшылығы бірлесе ұйымдастырған іс-шарада аталған мерекенің ұлт бірлігі мен ынтымағы үшін маңыздылығы атап көрсетілді. – 2016 жылдың 14 қаң­тарында Елбасы Нұрсұлтан Назарбаев Қазақстан халқы Ас­самблеясының құрылған күні – 1 наурызды елімізде Ал­ғыс айту күні деп жариялау туралы Жарлыққа қол қойды. Бұл – қиын кезеңде бір-біріне арқа сүйеп, аз уақыт ішінде жұмыла күш сала отырып, Елбасы жетек­шілігімен Тәуелсіз Қазақ­станның болашағын бірге сомдаған ел азаматтарының өзара құрмет күні, – деп атап өтті өз сөзінде қала әкімінің орынбасары Арман Қырықбаев. Мереке күніне орай Ал­ма­ты қаласындағы өзге ұлт өкілдерінің этномәдени бір­лестіктері ұлттық нақыш­тағы бұйымдар мен қолөнер заттарының, әр ұлттың салт-дәстүрінен сыр шертетін жәдігерлер мен туындылардың көрмесін өткізіп, думаншыл жұрттың ықыласына бөленді. Қанат ЕСКЕНДІР, «Егемен Қазақстан». АЛМАТЫ. Суретті түсірген Юрий БЕККЕР.