Оралда балалары Сирияға кеткен ата-аналар насихат жұмыстарын жүргізуде

ОРАЛ. 3 наурыз. Батыс Қазақстан облысының орталығы – Орал қаласында балалары радикалды діни ағымдардың жетегіне еріп, Сирияға кеткен және сол жақта қаза тапқан ата-аналар мешітке келіп жергілікті жамағатқа үгіт-насихат жұмыстарын жүргізуде. Бұл туралы batysnewskz.kz сайтына сілтеме жасаған egemen.kz тілшісі хабарлады. Ата-аналар өзгелерге сабақ болар деген ниетпен адасқан балаларының тағдырын баяндап, жамағатты теріс пиғылды ағымдардан сақтануға шақыруда. Облыстық дін мәселелерін зерттеу орталығының басшысы Жарас Ахановтың айтуынша, бүгінде Сирияға соғысқа кеткен оралдықтардың нақты саны белгісіз. «Бұл ақпаратты құзырлы органдар құпия ұстап отыр. Ал жат ағымның жетегінде кетіп, сотталған 24 азаматтың ішінде мемлекеттік қызметкерлер де болған. Меніңше, тура жолдан таюға отбасындағы тәрбиенің дұрыс жолға қойылмауы себеп. Сондықтан қазіргі таңда бірінші кезекте жастармен жұмысты күшейту керек», – дейді Жарас Аханов. Сонымен қатар, оның сөзінен жалған үгіт-насихатқа ұрынып, діни экстремистік көзқарасы бойынша сотталған және аталған орталыққа көмекке жүгінген азаматтардың 99 пайызының дұрыс тәрбие алмағаны белгілі болды. Темір Құсайын. Дерек: batysnewskz.kz. Сурет: muftyat.kz.