АСТАНА. 5 наурыз. Қорғаныс министрінің орынбасарлары халықаралық 8 наурыз әйелдер күніне орай әскери қыз-келіншектері үшін концерт ұйымдастырды. Бұл туралы egemen.kz тілшісі хабарлады.
«21 ғасырда әйел әскери қызметші немесе сарбаз әйелдің болуы ешкімді таңғалдырмайды. Елбасы – Жоғары Бас Қолбасшының сөзімен айтсақ, «бүгінде ер-азаматтар сияқты әйелдер де погон тағуға тең құқылы», деп Қорғаныс министрі Иманғали Тасмағамбетов әскери қыз-келіншектерге жылы лебізін білдірді.
Мерекелік концерт әйел әскери қызметшілерді шаттыққа бөлеп, көңілін бір көтеріп тастады. Бірде-бір көрермен бұл мерекеде назардан тыс қалмады. Оларға гүл шоқтары тарту етіліп, аяулы аруларға арнап арнайы шығарылған ән орындалды, ал жасұландықтар қыз-келіншектерді биге шақырды.
Алайда, концерттің ең басты тосынсыйы Қорғаныс министрі орынбасарларының көрсеткен өнерлері болды. Генерал-лейтенант Оқас Сапаров пен Нұрлан Сауранбаев лирикалық әндер орындаса, генерал-майор Талғат Мұхтаров сахнада театрландырылған қойылым көрсетіп, барлық залды тәнті етті.
Дастан Кенжалин.
Дерек, сурет: egemen.kz
