Тәрбие балабақшадан басталады

Бүгінгі күннің бір талабы – мем­лекет-жекеменшік әріптестігін дамыту барысында Алматы об­лы­сының әкімі Амандық Баталов 2015 жылдың басында, мектепке дейінгі тәрбиемен қамтуды Жетісу жерінде 77%-ға жеткізу ту­ралы мемлекеттік қызметкерлер мен кәсіпкерлерге тапсырма берген еді. Нәтижесінде бір жылдың ішінде облыстың бала­бақшамен қамту көрсеткіші 13,3%-ға артты. Бұл ретте сүбелі үлесін қосып жүрген кәсіпкерлер баршылық. «Білім саласына 2009 жылдан бері инвестиция тартып жүрген кәсіпкермін. Талғар ауданы, Гүл­дала ауылдық округіндегі Жа­­ңа Қуат елді мекенінде 500 ба­лаға арналған екі балабақша, 350 орындық мектеп құрылысын салып, 156 адамды жұмыспен қамтып отырмын. Мемлекет қа­зынасына жыл сайын 30 млн.теңгеге жуық салық төленуде. Бү­гінгі күні мемлекет-жекемен­шік әріптестігін жандандыру мақ­­са­тында Қапшағай қаласынан 59 сотық жер телімін сатып алып, бірінші қабатында 250 орындық балабақшасы бар тұрғын үй ке­ше­нінің құрылысын салуды жос­парлап отырмын. Осы әлеуметтік нысанды мемлекет-жекеменшік әріптестігі негізінде билік қолдаса нұр үстіне нұр болар еді. Бұл жоба облыс басшысының 2016 жылы балабақшамен қамтуды 87%-ға жеткізу туралы берген тапсырмасын дер кезінде орындауға өзіндік үлесін қоспақ. Осындай жетістіктермен қатар, шешімін таппай тұрған мәселелер де бар. Бірақ қай проблема болмасын, қазіргі таңда Елбасымыздың кә­сіп­­керлерге деген қамқорлығы ар­қасында шешімін табады деген сенімдемін. Менің мектеп пен балабақшаны тұрғызған ауылым Алматы қаласының жанында орналасқан. Өкінішке қарай, осы мекен жайдың әлі әкімшілік мәртебесі болмағандықтан, мектеп құрылысының инфрақұрылымын – суды да, электр жарығын да өз қаражатыммен өткіздім. Бі­рақ, мектепке барар жолды ас­фальттауға менің мүмкіншілігім жетпеді. Бүгінгі күні 450 метр же­ріне ескі асфальт пен қиыршық тас төсеп, қара жол салып қойып отырмын. Мектепке барар жолда қараусыз жатқан бос жерлерге көпшілік демалатындай сквер жасап, көгалдандырып, шамдар ор­натып, спорт кешендері мен велосипедшілерге арналған жол салсам ба деген ойым бар», деді кәсіпкер Күләнда Батырбекова. Өткен жылы қазан айында аталған кәсіпкердің бас­шы­лы­ғы­мен «Дана» мектебінің ашылуы салтанатты түрде өткен еді. Аз уақыт ішінде балалары түрлі халықаралық, республикалық, байқаулар мен олимпиадалардың жеңімпаздары атануда. Мек­теп­тегі бассейнге былтыр ашыл­ған инклюзивті екі топтың балалары қатысып, халықтың ри­зашылығына бөленуде. Со­нымен қатар, мек­тептің заманауи жабдықталған ба­засында ауыл балаларын жаппай спортпен шұғылдануға, қо­сымша білім берумен қамту үшін мемлекет-жекеменшік әріптестігі негізінде түрлі үйірмелер ашуға өз үлесін қосуға кәсіпкер дайын. Сонымен қатар, Күләнда Ба­тырбекова тек кәсіпкерлікпен шек­­теліп қалмай, қоғамдық жұ­­мыстарға да белсене араласа білетін өрелі жан. Өзіндік ойы бар. Ең бастысы, мына жұ­мыс тек ер-азаматтарға ға­на тән екен деп іркілмейді. Сөй­тіп, қай­та сайланған өңірлік кә­сіп­керлер палатасына Талғар ауда­ны бойынша мүшелікке өтіп, жауапкершілігін арттыра түсуде. Сондықтан еліміздің кәсіпкерлерін өз инвестицияларын әлеуметтік-экономикалық мәселелерді шешуге, ұлттың ұрпағына ұлағат нә­рін сіңіруге шақыруда. Тағы бір айта кетер жайт, кәсіпкердің өтінішін өңір басшысы естісімен бірден Талғар ауданының әкіміне мемлекет-жекеменшік әріптес­ті­гі аясында аталған кәсіпкерге қолдау көрсету жөнінде дүйім жұрттың алдында нұсқау берді. Нұрбол ӘЛДІБАЕВ, «Егемен Қазақстан». Алматы облысы.