Еліміз бар тыныштықты ту еткен

Кеше Тұңғыш Пре­­зидент – Ел­ба­­сы­ның кітап­хана­сында Қазақ­стан халқы Ассам­блеясы Төраға­сының орын­басары – Хатшылық меңгерушісі Ералы Тоғжанов пен Румыния Парламенті Депутаттар палатасы төрағасының орынбасары Флорин Иордакенің кездесуі болды. Кездесуде Ералы Тоғжанов Ассам­блея­ның жұмысымен меймандарды таныс­тыра келіп: «Біз қазақстандық модельді БҰҰ мінберінен, ЕҚЫҰ-ның 56 мүшесінің қатысуымен Копенгаген мен Варшавада көпшілік назарына ұсындық. Жұртшылық тарапынан қызығушылық аса зор. Тек соңғы жылдың өзінде біздің тәжірибемізді зерде­легісі келген 26 елдің делегациясы­мен кездестім. Елбасы Нұрсұлтан Назарбаев еліміздегі бірлікті дәріптейтін, оның оң істеріне ұйытқы болатын Пира­ми­даны – Бейбітшілік және келісім сарайын салғызды. Қазір әрбір облыс орталық­тарында Достық үйлері бар. Онда еліміздегі барлық этномәдени бірлестіктер жұмыстарын жүргізеді. Бүгінгі күні Қазақстан аумағында 920 этномә­дени бірлестік бар. 6 ұлттық театр, 37 түрлі тілде бұқаралық ақпарат құра­лы, 192 этностардың тілдерін үйрететін орта­лық­тар жұмыс атқарады», – деп ҚХА аясын­дағы істердің ауқымы өте кең екенін қонақ­тарға жеткізіп, қазақ халқының ежелден меймандостығын, тыныштықты ту еткен халық екенін айтты. Әр этностың дәстүрі мен мәдениетін сақ­таудың маңызына тоқталған Ералы Тоғ­жанов бүгінгі күні Қазақстанда 20 мың румын мекендейтінін, олардың басым бөлігі Қа­рағанды аймағына қоныс­танғанын айтты. Флорин Иордаке делегация құрамымен таныстырып өтті. Олардың арасында Румыния Парламенті Депутаттар палатасындағы аз ұлттар мәселесі жөніндегі парламенттік топтың мүшесі, Түрік-мұсылман және татар демократиялық партиясының мүшесі, татар бауыр Әмет Варол бар екен. Осы сәтте: «Қазақ пен татар бір-бірімен кездескенде «исәнбісіз» деген, исәнбісіз сізбен біз аудармашысыз-ақ түсінісетін шығармыз», – деп меймандарды бір күлдіріп алды Е.Тоғжанов. «Біздің Румыния Парламентінде аз ұлттардың өз үні бар, яғни арнайы квота арқылы олар депутат болып сайланады. Ал менің Парламенттегі міндетімнің бірі халықаралық байланыстарға қатысты, сондықтан да, Қазақстан мен екі арадағы қатынастардың қанатын кеңейте түсуі, оның түрлі бағытты – саяси-экономикалық, гуманитарлық, мәдени салаларды қамтуы маңызды. Румыния бұл ретте Қазақстан мен Еуроодақ арасындағы мықты көпірдің қызметін атқарғысы келеді», – деген Флорин Иордаке қазіргі күні румыниялық өз әріптестерінің біразы халықаралық ұйымдар аясында жақында өтетін сайлауға байқаушы ретінде қатысып отырғанын да жеткізді. Кездесуге қатысушылар халықаралық әріптестік аясында ҚХА мен өзара іс-қимыл мәселесін талқылай келе, қоғамдық келісім мен жалпыұлттық бірліктің қазақстандық үлгісіне тоқталды. Біздің тараптан ҚХА мүшелері, Парламент Мәжілісінің V шақырылымының депутаттары Ахмет Мурадов, Юрий Тимощенко, «Буковина» румын мәдени бірлестігінің төрайымы Аурика Дяк сөйледі. Ф. Иордаке Қазақстанның этнос­ара­лық келісім саласындағы оң тәжірибесін және Қазақстанда жүргізіліп отырған бей­бітшілік пен келісім саясатын Румы­нияның жоғары бағалайтынын жеткізді. Кездесу соңында қос тарап кәде­сыйлар алмасты. Анар ТӨЛЕУХАНҚЫЗЫ, «Егемен Қазақстан».