14 Қаңтар, 2011

Алматыдағы алау енді еліміз облыстарына қарай жол тартпақ

289 рет көрсетілді

Азиада додасының дүбірі жа­қындап келе жатқанын ел енді, міне, анық сезіне бастады. Спорт десе ішкен асын жерге қоятын бұқара Олимпиада атаулының бәрі алаудың тұтануымен тұсау­ын кесетінін біледі. Алайда, Азия ойын­дарының тарихында осы шара алауының эстафетасы тұңғыш рет Қазақстанда ұйым­дас­тырыл­ғанын екінің бірі біле бермес. Алдыңғы күні Әл-Кувейт қа­ла­сында тұтанған алау Алатау баурайындағы Алматыға да келіп жетті. Оңтүстік астанадағы барша БАҚ өкілдері сәрсенбінің сәтінде Алматы халықаралық әуежайынан осы алауды күтіп алды. Азиада алауы еліміздегі Туризм және спорт министрі Темірхан Досмұхамбетовке тапсы­рылған еді. Ол арнаулы әуе кемесімен жеткізілген бұл аманатты Алматы қа­ласының әкімі Ахметжан Есі­мовтің қолына ұстатты. – Алау Алматыға келді! Бұл өте қуанышты әрі нышанды оқи­ға. Еліміздің барлық аймағында өтетін Азиада шеруі дәл осы қаладан бастау алғалы тұр. Ол бір жағынан үлкен абырой болса, екінші жағынан үлкен жауапкершілік, – деді қала әкімі журналистерге берген сұхбатында. Қала әкімі Азиадаға Ал­маты­­ның барын салып дайын­да­лып жатқанын, спорт кешен­дерінің ескісі жөнделіп, жаңасы салы­нып, Қысқы олимпия ойын­­дары басталатын күнге сақадай сай тұрғанын қысқаша баяндап өтті. Осылайша, салтанатты оқи­ға­­лар легі басталып та кетті. Ал­матының ауа райы да бұл күні келісті шараға болыс­қандай, қаң­тар­дың қақ ортасы болса да, жай­машуақтанып шыға келді. Ха­лық­аралық шаңғы трамплині кешенінде бірінші факельді Ал­маты қаласының әкімі тұтатып, оны орынбасары Серік Сей­ду­мановқа табыстады. Осыдан кейін Азиада алауын алып жүруге лайықты деп табылған 80 адам кезегімен қала­ның орталығына қарай беттеді. 11,7 шақырымға созылған шерудің өн бойында 30 шақты көрнекті спорт майталма­нын, алау­ды алып жүру абыройы бұйырған азамат­тарды, спортқа ғұмырын арнаған жаттықтыру­шыларды қалалықтар қолпашпен қарсы алып отырды. Алматыдағы алау эстафетасы «Астана» алаңына дейін жалға­сып, салтанатты шеру үлкен концерт пен отшашуларға ұласты. Алматыдан кейін алау Таразға тартатын болады. 30 қаңтарға дейін Азиада алауы еліміздің барлық облыс орта­лықтарында тұтанып, 1020 адам оны кезегімен алып жүретін болады. Мұндай абыройға облыстардан – 60, ал Астана қаласынан 100 адам іріктелген. Айнаш ЕСАЛИ, Суреттерді түсірген  Берсінбек СӘРСЕНОВ. Алматы.

Жамбыл жеріне жетті

Тараз – еліміздегі ең ежелгі тарихи шаһар ғана емес, сонымен бірге, даңқ­­ты боксшылар С.Қо­нақ­баев, Б.Жұмаділов, Е.Ыбы­­­райы­мов, Б.Ниязымбетов, М.Мә­­зім­­­баев, Б.Артаев жә­не атақты балуандар А.Мұ­са­­­б­еков, И.Байрамуков, С.Жар­­­­тыбаев сияқ­ты Олим­­­пиада, Азия ойын­дары мен  әлем, Еуропа чемпионат­тарында топ жарған тағы басқа да көптеген спорт­шыларды тәр­биелеп өсір­ген құтты бесік. Ол, соны­мен бірге, жағрапия­лық жа­ғы­нан Ұлы Жібек жо­лы­ның бо­йын­дағы алау оты лапыл­дап өтетін ал­ғаш­қы облыс ор­талық­тары­ның бірі. Сон­­дықтан болар, VІІ Қыс­қы Азия ойын­дарының алауы Ал­матыны аралап өткен­нен кейін арнайы ұшақпен бірден Жамбыл облы­сы­ның орта­лығы – Тараз қала­сына жеткізілді. Кеше сағат 12:00-де облыс әкімі Қанат Бозымбаев Азиада алауын қолына алып, Қазақстан Республи­касының Тұңғыш Президенті саябағынан Төле би даң­ғы­лына түсті. Жас кезінде спортпен шұ­ғыл­данып, ринг құпиясын меңгеру үшін біраз тер төккен облыс басшысына әудем жерді жүгіріп өту қазір де қиын емес. Ол өзіне бекітілген бағыт бойын­дағы қа­шықтықты сергек қимыл­мен еңсе­ріп, ежелгі сақтардың шырағданы бейнесінде жасалған алауды келесі эстафеташыға та­быс етті. Кәсіпқой бокстан әлем чем­пионы Марат Мәзімбаев облыс әкімінен алауды алғанда көше бойындағы қала тұрындары, студенттер, оқушылар, мекеме бас­шы­лары мен қызметкерлері қуа­ныштан қолдарындағы жалау­­шаларды бұлғап, жігер жанитын ұранға басты. «Алға, Қазақстан!» деген үнмен бірге аспанға атыл­ған түрлі-түсті қағаз факельдер жерге шашу болып шашылды. Үшінші алаугер Э.Айға­лиева – үлкен спорттағы даңқты жолы енді басталып келе жатқан жас. Бүгінде Алматы қаласында оқып, жаттығу жасап және үлкен жа­рыс­тардан олжалы оралып жүр­ген ол тараздық­тардың үкілі үмі­ті. Олимпиада мен әлем чем­пионатының жеңі­сінен үмітті он сегіз жастағы суда жүзу спорты­ның саңлағы Эль­мира екі жүз метр қашықтықты еліктің ерке лағындай еркін жүгіріп өтіп, қолындағы алауды А.Әшімовке табыстады. Халқына «Қыз Жібек», «Атаманның ақы­ры», «Транс­ібір экспресі» атты тамаша фильмдердегі сүйікті қа­һар­мандарымен құрметті атақты актер де бір кездері Жамбыл облы­сынан түлеп ұшқан болатын. Сон­дықтан болар, оның алауды бір спортшыдан алып, екінші спорт­шыға табыс­таған кезін тастүлек­терінің қанат қағысын байқап, сәт сапар тілеп, бата берген ата қыранға теңедік. Алау алып жүгіру, жалпы, әр елде әр түрлі өтеді дегенмен, оның негізгі өзегі ұлттық салт-дәстүрге  табан тірейтіні белгілі. Тараз қаласының Жамбыл және Төле би даңғылдарының қиы­лы­сын­да VІІ Қысқы Азия ойындары­ның алауы – «Әулиеата» көкбөрі клубы­ның сайыпқыран-шабандоз­дары­­ның қарулы қолына тиді. Бұл команда мүшелері еліміздегі ең үздік көк­паршылардан екені белгілі. Алау­ды қолына нық ұстаған көк­пар­­шылар көшбасшысы Н.Мо­мынов  бастаған салтатты шабандоздар салтанаты эстафета салтанатына ұлттық реңк беріп, сәнін асыра түсті. Сондай-ақ, алауды көкпар­шы­лардың қолы­нан түйе балуан, өзі де нар тұл­ғалы спортшы  Б. Ыстыбаевтың қабылдап алуы ма­ғыналық жа­ғы­нан үйлесіп тұрды. Бұдан кейін жұрт алды­нан алау ұстап өту бақытына ие болған бапкерлер мен спорт­шы­лар М.Жахитов, А.Мұса­бе­ков, Е.Сметов, Б.Ния­зым­­бе­тов­ке тиді. Алау эстафетасының түс қай­та басталған екінші кезеңін Сидней Олимпиадасының күміс жүл­де­гері Ислам Байрамуков жыр алы­бы Жамбыл Жабаевтың ескерткішінен бастады. Осы­лайша жал­ғас­қан эстафета сән-салта­на­ты ал­пысыншы, яғни об­лыстың ең басты  алаугері, атақ­ты бокс­шы, Атланта және Сидней Олим­пиа­даларының күміс жүлдегері, Хьюстонда (АҚШ) өткен әлем чемпио­натының же­ңім­пазы Болат Жұмаділов сын­ды беренге де жетіп, ол қо­лындағы VІІ Қысқы Азия ойын­дарының алауын асыға күтіп тұрған Оң­түстік Қазақстан об­лысы өкіл­дері­нің қолына «Аспанда күн, жер­де Азиада алауы сөнбесін!» деген ақ тілекпен табыс етті. Көсемәлі СӘТТІБАЙҰЛЫ, Жамбыл облысы.
Соңғы жаңалықтар

Шырайлым, шашыңды жая көрмеші!

Руханият • Бүгін, 22:32

Алексей Цой отставкаға кете ме?

Қазақстан • Бүгін, 15:37

Ұқсас жаңалықтар