«Алтын сақа»

Алматыда балалар спектакльдерінің алғашқы фестивалі өтеді Ұлыстың ұлы күні мен Ха­лық­аралық театр күніне орай, Алма­тыдағы Ғ.Мүсірепов атын­дағы Қазақ мемлекеттік академиялық балалар мен жасөспірімдер театры тұңғыш рет «Алтын сақа» атты балалар спектакльдері фестивалін өткізуге қам-қарекет жасауда. Осылайша аталмыш театр­дың 70 жылдық мерейтойы қарса­ңында, биыл бірінші рет балалар спектакльдерінің фестивалі ұйымдастырылғалы отыр. Театр саласындағы соны бастамада «Наурыз думан», «Ер көжек», «Алтын мүйізді киік», «Томпақпен келген Жаңа жыл», «Маугли», «Батыл көжектер», «Алдар көсе» сияқты кішкентай көрермендердің спектакльдері салтанат құрады. Фестивальде Байділдә Қалтаев атын­дағы «Ең үздік ер адам бей­несі үшін», Аққағаз Мәмбетова атындағы «Ең үздік әйел бейнесі үшін», Қасым Жәкібаев атындағы «Ең үздік қосалқы рөлдегі ер адам бейнесі үшін», Әмина Өмірзақова атындағы «Ең үздік қосалқы рөлдегі әйел бейнесі үшін», «Ең үздік эпизодтық рөл», «Эпизодтық рөлдегі актерлық шеберлігі үшін», «Көрермендер көзайымы», «Ең үздік дебют» номинациялары бойынша марапаттау рәсімі өткізіледі. Айнаш ЕСАЛИ, «Егемен Қазақстан». АЛМАТЫ.