21 Наурыз, 2016

Талап деңгейінде өткізілді

249 рет
көрсетілді
4 мин
оқу үшін
Жанмұрат ЖАНАЙДАРОВ, Сайлауды байқау жөніндегі рес­пуб­ликалық қо­ғамдық комис­сияның Ақмола облысы бойынша өңірлік орталығының мүшесі. Мен облыс­тық комиссия бекіткен Ақкөл ауданы мен Степногор қаласындағы сайлау учаскелеріндегі жұмыс барысын байқауға қатыстым. Сайлау учаскелерінде бізбен бірге саяси партия өкілдері, үміткерлердің сенімді өкілдері, БАҚ қызметкерлері күні бойы жұмыс істеді. Учаскелерде ақпараттық ашықтық, біздің міндетімізге түсіністікпен қарау қамтамасыз етілді. Осынау маңызды науқанға мерекелік сипат берілгенін атап өтуге болады. Дауыс беруге келгендер өзінің азаматтық парызын кідіріссіз орындап жатты. Сайлау бюллетеньдері мұқият саналып, учаске мүшелерінің үстелдеріне алфавит бойынша үлестіріп берілді. Халық өзінің конституциялық құқығын толық пайдаланды. Келеңсіздіктер көрініс берген жоқ. Дауыстарды санау, тиісті құжаттарды тол­тыру, қаулы алу қатаң тәртіп негізінде жүргізіл­геніне күмәнім жоқ. Ақмола облысы.

Ойдағыдай өтті

Ғосман ТӨЛЕҒҰЛ, Сайлауды байқау жөніндегі республикалық қоғамдық комиссияның Ақмола облысы бойынша орталығының төрағасы. Сайлауды бай­қау жө­ніндегі рес­пуб­ликалық қо­ғамдық ко­миссияның об­лыстық филиалы кезекті саяси науқанның жауапты сынынан ойдағыдай өтті деп ойлаймын. Өңірде әділ сайлау мен сайлау науқанының ашықтығы қамтамасыз етіл­гені ай­қын көрініс берді. Бұл – бізге жүктелген басты мақсат. Сондай-ақ, бұл комиссия мүшелерінің, өңір­лердегі 758 қоғамдық көмекшілеріміздің тия­нақты ісінің нәтижесі деуге де болады. Биылғы сайлау, әдеттегідей, облыс тұрғын­дарының саяси сарабдалдығының өскендігін дәлелдеді. Біз де өз тарапымыздан ортақ істің оралымды болуына үлес қосуға тырыстық. Алдымен байқаушыларымыздың басын қосқан семинарға республикалық қоғамдық комиссияның мүшесі Тамара Ширмер қатысып, комиссияның сайлауалды науқанының демократиялық қағидалар талаптарына сай ұйымдастырылуына, азаматтардың еркін пікір ұстанымын қамтамасыз етуге септесетіндігін атап көрсетті. Облыстық филиал мүшелері жоспарлы кесте бойын­ша облыстың барлық аудандарында семинар-тренингтер өткізді. Біз онда сайлау барысында саяси бей-тараптық, ашықтық және әділдік қағидаттары қатаң сақталуына, азаматтардың конституциялық құқықтарының бұрмалануына жол берілмеуіне көңіл бөлдік. Сайлау барысында да облысымыздағы барлық учаскелерде комиссия мүшелері белсенділік танытты. Мен жұмысты Красный яр кентіндегі кәсіптік-техникалық лицейден бастадым. Сайлау учаскесі таңғы 7-ден дауыс берушілерді қабылдай бастады. Мұн­дағы ұйымдық мәселелерде ешқандай кемшілік орын алған жоқ. Азаматтар жабық дауыс құқығын пайда­ланып, таңдау еркіндігіне ие болды. Одан кейін де біршама сайлау учаскелерінде болдық. Заңдық талаптар, халықаралық нормалардың бұрмалану көрінісі тіркелмеді. Біз сайлау барысына тікелей араласпа­ғанымызбен бюллетеньдер салынған жәшіктерді ашу, оны санау, дауыс беру барысы мен оның қорытындысын шығару ісін жіті байқауда ұстадық. Біз маңызды науқанның ойдағыдай өткендігін кепілдендіре аламыз. Ақмола облысы.

Жастар белсенділігі

Мен №6 сайлау округіне қарасты Жолдас­беков атындағы №9 орта мектептегі №89 сайлау учаскесіне сағат таңғы 7-де келдім. Жастар орталығының қызметкерімін. Осында сайлауға түсіп жатқан партия және үміткердің, қоғамдық ұйымдардың байқаушылары сайлау барысын толық бақылап отыр. ЕҚЫҰ және халықаралық ұйымнан жа­сақталған бай­қау­шылар да келіп, сай­лау учаскесіндегі жағдаймен танысып жатыр. Таңертеңгілік жұрт өте көп келді. Түстен кейін саябырсыды. Бізді сайлауға жастардың мол келгені сүйсіндіруде. Олар ел ертеңіне алаңдайтынын осындай белсенділігімен байқатып жатыр. Меруерт АМАНЖОЛОВА, Сайлауды байқау жөніндегі республикалық қоғамдық комиссияның Оңтүстік Қазақстан облысы бойынша өңірлік орталығының мүшесі. Оңтүстік Қазақстан облысы.