21 Наурыз, 2016

Жастар жауапкершілігі жоғары екен

321 рет
көрсетілді
3 мин
оқу үшін
1211Еліміздегі Парламент Мәжілісінің депутаттарын сайлау барысын қадағалауға шекара асып 800-ден астам халықаралық сарапшы және 150-ге жуық шетелдік БАҚ өкілдері келген болатын. Қазақстандағы сайлау үдерісін қадағалау жұмыстары бойынша арнайы келген шетелдік сарапшы, сенатор және НАТО ПА-дағы Италия делегациясының мүшесі Франко ПАНИЦЦАДАН бірер сауалға жауап алған едік. – Франко мырза, біздің елге қош келіпсіз дей отырып, бүгінгі сайлау барысына байланысты өзіңіздің сарапшы ретіндегі пікіріңізді білсек дейміз? – Мен Қазақстанға кел­геніме қуанып отырмын. Ра­сында, Италия мен Қа­зақстан арасында достық қарым-қатынас орнатылған. Біз жас мемлекет ретіндегі Қазақстанның әлемдік сая­саттағы орнының уақыт санап артып келе жатқандығын мойындаймыз. Ал сайлау барысына келер болсақ, дауыс беруге келушілердің санының көптігі бірінші кезекте назарыма ілікті, яғни азаматтардың белсенділігі таңғалдырды. Со­нымен қатар, айта кету керек, өз болашағына алаңдайтын жастардың сайлауға көптеп келуі қуантты. Десек те, ел тағдырына тол­ғанатын егде жастағы аза­мат­тардың да қатары қалың болды. Оған себеп, жастармен бірдей үлкендер де сайлау учаскелеріне таң атпай келіп, дауыс берудің жауапкерші­лігін сезінетіндігін аңғартты. Және де мүмкіндігі шектеулі жандарға арнайы жағымды да қолайлы жағдайлар жа­салғандығы көңіл қуантты. Айта кетейік, ел депутаттарын сайлау үшін шетелдегі қазақстандықтарға да сол елдерден учаскелер ашылып, дауыс беруге мүмкіндіктер қарастырылған. – Өзге мемлекеттердегі сайлау барысын бақылай отырып, өмірлік тәжіри­беңізде біздің елдегі нендей ерекшеліктерді атап айтар едіңіз? – Жоғарыда айтып өт­ке­німдей, жұртшылықтың жаппай белсенділігін бірінші айтар едім. Және де дайындық жағ­дайы, ұйымдастырушылық жұмыстары, техникалық жа­рақтар сақадай сай, азаматтар өз ісіне жауапты болғанын байқадым. Сонымен қатар, сайлау кезінде ешқандай олқылықтарды кездестіргенім жоқ, яғни заң нормалары сақ­­талған, барлық талаптар­ға сай өтуде. Бір қызығы – сай­­лау күні туған нәрес­те­лерге әдемі сыйлықтар та­ғайындалғаны таңғалдырды. Бұл дегеніңіз – жұртшылықтың қызығушылығы мен құрметін арттыру дегенді білдіреді. Бір ғана сайлау учаскесінде түске дейін-ақ 700-ге жуық адам дауыс беріп үлгергенін көрдік. Бұл да ауыз толтырып айтарлықтай үлкен көрсеткіш, жоғары бағаға лайық жағдай. Менімен бірге келген италиялық мамандар да жастардың жаппай белсенділігін айтып жатыр. Менің де байқағаным осы жағдайлар болды. Алдағы уақытта Қазақстан мемлекетіне мол табыстар тілеймін! – Рахмет. Әңгімелескен Эльмира МӘТІБАЕВА, «Егемен Қазақстан».