Париж төріндегі Наурыз

Парижде Біріккен Ұлттар Ұйымының Білім, ғылым және мәдениет жөніндегі ұйымының (ЮНЕСКО) штаб-пәтерінде Әзербайжан мен Ауғанстанның, Үндістан мен Иранның, Ирак пен Қазақстанның, Пәкістан мен Тәжікстанның, Түрікменстан мен Түркияның Тұрақты өкілдіктері Халықаралық Наурыз күніне арналған іс-шара ұйымдастырды. ЮНЕСКО Бас директорының орынбасары Нада әл-Нашиф өз сөзінде «Нау­рызды мәдени әралуандық, өзара сыйластық пен үндесудің тамаша мейрамы», деп айта келе БҰҰ оның маңызын халықаралық мейрам ретінде жариялау және ЮНЕСКО-ның Адамзаттың материалдық емес мәдени мұрасы жөніндегі көрнекі тізіміне енгізу арқылы танығанына назар аударды. Іс-шараға жиналған қонақтар – халықаралық ұйымдардың, ғылым мен мәдениет және өнер салаларының өкілдері ұлттық тағамдардан, соның ішінде қазақ тағамынан да дәм татты. Жиын барысында Қазақстан хал­қы­ның мәдени мұрасы, өнері және дәстүрі жөніндегі баспа өнімдері мен иллюстрациялық материалдар таратылды. Ұйымдастырушылар тарапынан сөз алған Иран елшісі Ахмад Джалали жарқын мейрамға арналған салтанаттың ЮНЕСКО төрінде дәстүрге айналғанын атап өтті. Ағымдағы жылғы желтоқсанда ЮНЕСКО-ның Материалдық емес мәдени мұраны қорғау жөніндегі комитеті Әзербайжан, Ауғанстан, Үндістан, Иран, Ирак, Қазақстан, Қырғызстан, Пәкіс­тан, Тәжікстан, Түрікменстан, Түркия және Өзбекстан – 12 елдің атынан жаңартылған «Наурыз» мейрамы аталымын Адамзаттың көрнекі тізіміне енгізу мүмкіндігін қарас­тыратын болады деп күтілуде. «Егемен-ақпарат».