Ағайынды Махровтар

жасаған әшекей бұйымдар сұранысқа ие Ағалы-інілі Махровтар – он саусағынан өнер тамған нағыз шеберлер. Олардың Ақмола облысына қарасты Бурабай ауданында жеке шеберханалары бар. Бүгінде ұсталардың қолынан шыққан әшекей бұйымдарды ауылдастары таласа-тармаса сатып алады. Таяуда Көкшетау қаласында іскер әйелдер форумы өтті. Шараға келген қыз-келіншектер алдымен қолөнер шеберлерінің бұйымдары қойылған көрмеге қатысты. Сон­да ағайындылардың қолымен жасалған әшекейлеріне қатты қызығып, тіпті таласа сатып алды. Сондай-ақ, іскер әйелдер ара­сында күнделікті тұрмысқа қажетті қолөнер бұйымдарын ұнатып, сатып алғандар да бар. Әсіресе, нан өнімдерін салатын кәрзеңкеге сұраныс мол болды. – Біз үшін қолөнер ата кәсібіміз іспеттес. Әкеміз үнемі бізге өзінің білгенін үйретуден жалыққан жоқ. Оның өз шеберханасы болған. Бауырым екеуміз күн сайын әкеміз­дің жанынан шықпай, әшекей бұйымдарды, басқа да қажетті зат­тарды қалай жасау керектігін үйрендік, – дейді Николай Махров. Айта кетейік, ағайындылардың ұстаханасынан шыққан әрбір бұйым жоғары сапаға ие. Сондай-ақ, ақмолалықтар да отандық өнімді қолдау мақсатында осы шеберлердің тауарларын көптеп сатып алуды әдетке айналдырған. Талғат РАЙЫМБЕК, «Егемен Қазақстан».