Қазақ биінің бір биігі

Нұрсұлу Тапалова атындағы республикалық би байқауы көпшілікті сүйіндірді Облыс орталығындағы Қазақстан халқы Ассамблеясы ғимаратында Тәуелсіздіктің 25 жылдығына және облыстық халық шығармашылығы үйінің 55 жылдығына арналған Нұрсұлу Тапалова атындағы III республикалық «Бидің нұры – Нұрсұлу» атты жеке орындаушылар би байқауы өткізілді. Бұл байқауға кәсіби және әуес­қой би ұжымдарының 15-25 жас аралығындағы жеке орындау­шылары қатысты. Байқау екі турдан тұрды. Бі­рін­ші турда би додасына қаты­сушылар халықтық би мектебі бойынша өнер көрсетті. Ал, екін­ші турда бишілер өз таңдаған билерін биледі. Байқау шымылдығы Мәскеу қаласында өткен халықаралық би байқауының Гран-при жеңім­пазы «Mega Star» сән және би студиясы бишілерінің биімен ашылды. Содан кейін қазақтың тұңғыш балеринасы Нұрсұлу Тапалова туралы бейнефильм көрсетілді. Тума таланттың қазақтың балет би өнерінде жарқырай жанған жұлдызды сәттері жаңғыртылып, кейінгі толқын жастарға өнеге ретінде ұсынылды. Оның кезінде академик Ахмет Жұбановтың көзіне түсіп, күміс көмей ән­ші Күләш Байсейітова, мың бұралған буынсыз биші Шара Жиенқұлова және басқа ұлттық өнеріміздің іргетасын қалаған ұлы тұлғалармен бірге қазақ өнері мен мәдениетінің бастауларында тұрып, ұлттық өнердің қалыптасуына бір кісідей еңбек сіңіргені белгілі. Әлемге әйгілі балет бишісі Галина Ула­новамен бірге биледі деген де дерек бар. Ол «Жамбыл», «Белые розы» фильмдеріне түскен. Ал, қазақ балетінің дамуына қосқан үлесі ұшан-теңіз деу орынды. Біз мұны атақты биші Болат Аюхановтың естелігіне сүйеніп айтып отырмыз, әрине. Байқауға қатысушылар өнерін еліміздегі хореография сала­сы­­­ның жетекші мамандары баға­лады. Астаналық биші Асхат Мәден байқаудың Гран-при жүл­десін жеңіп алды. Бірінші орын­ды да астаналық Сағыныш Нұр­хайдарова иеленді. Екінші орын Оңтүстік Қазақстан облысының бишісі Маржан Сәрсенбекке бұйырды. Үшінші орынды Маңғыстау облысынан келген биші Анар Қыдырбаева мен ақтөбелік Кәмшат Бимағанбетова бөлісті. Байқау жеңімпаздары мен жүлдегерлері дипломдармен және ақшалай сыйлықтармен марапатталды. Байқауға қатысқан бишілердің барлығына би өнері сайысын ұйымдастырушылар атынан сый-сияпат жасалды. Сатыбалды СӘУІРБАЙ, «Егемен Қазақстан». Ақтөбе облысы.