Су тасқыны – бақылауда

Өңірдегі өзендердің тасу мерзімі жылдағы межесінен бір апта ерте басталды. Облыс әкімі Бердібек Сапарбаев көктемгі су тасқынына қатысты ахуалды біліп, алдағы атқарылар шараларды белгілеу үшін Қарғалы, Ақтөбе және Сазды су қоймалары аумақтарын аралап, жағдаймен танысты. Қазіргі уақытта аталған су қой­­маларының барлығы дерлік қар­дың еріген суын қабылдайтын мүмкіндіктері бар. Облыстың сол­түстік өңірлеріндегі Мәртөк, Хром­тау, Қарғалы, Әйтеке би аудан­дарында және Ақтөбе қаласы аума­ғында ғана қар қалып отыр. Қардың қалыңдығы 5-87 сантиметр шамасында деп есептелуде. Облыстық төтенше жағдайлар жөніндегі департаменттің басшысы Бауыржан Сыздықов, «Қазсушар» РМК Ақтөбе филиалының директоры Бекзат Нәметов өздері жетекшілік ететін салалар бойын­ша жүзеге асырылып жатқан жұмыстар жөнінде баяндап берді. Облыс бойынша ақпан айынан бастап су тасқынына қарсы жұмыстар тиянақты жүргізіліп жатыр. Су ағатын арықтарды тазалау, өзендердің арнасын кеңейту қолға алынды. Бердібек Сапарбаев Қарғалы ауданында болған сәтінде осы өңірдегі қауіпті аймақтардың бірі Қосестек ауылының көктемгі су тасқынына әзірлігімен таныс­ты. Ау­дан әкімі Рахат Сыдықов жергілікті жерде атқарылған шаралар туралы баяндады. Ағымдағы жылы көктемгі су тасқыны қау­пінің алдын алу мақсатында «Қазсушар» РМК Ақтөбе филиа­лы су шаруашылығы нысандарында көтергіш механизмдеріне, су торабындағы электр жүйелеріне тексерістер жүргізіп, жанар-жа­ғар­май және апаттық материалдар қорын дайындады. Резервке апаттық дизель электр станса әзірленді. Барлық республикалық меншіктегі нысандар техникалық тексеруден өткізілді. Нысандарда тұрақты байланыс жүйелері жұмыс істейді. Сатыбалды СӘУІРБАЙ, «Егемен Қазақстан». Ақтөбе облысы.