Ақтөбеде «Нео-фольклор» атты байқау өткізіледі

АҚТӨБЕ. 8 сәуір. Ақтөбеде «Нео-фольклор» атты байқау өткізіледі. Бұл туралы осы байқауды ұйымдастыру комитетінің ақпары бойынша egemen.kz тілшісі хабарлады. «Әйелдердің құқықтары мен мүмкіндіктерін кеңейту» атты БҰҰ-ның Қазақстандағы даму бағдарламасы және Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссия жобасының аясында «Нео-фольклор» киімдер дизайнерлері мен ұмытылып бара жатқан және жаңғыртылған қазақ ұлттық тағамдары республикалық байқауларының қалалық кезеңі өтеді. Байқау «Астана» EXPO – 2017» халықаралық көрмесіне әйелдердің де қатысуына дайындық мақсатында ұйымдастырылып отыр. Байқауларды өткізу үшін ұйымдастыру комитеті құрылып, «Нео-фольклор» киімдер дизайнерлері мен ұмытылып бара жатқан және жаңғыртылған қазақ ұлттық тағамдары байқаулардың ережесі бекітілді. Байқаулардың ұйымдастырушысы — Ақтөбе қаласы әкімінің жанындағы әйелдер істері және отбасылық-демографиялық саясат жөніндегі комиссия. «Ұмытылып бара жатқан және жаңғыртылған қазақ ұлттық тағамдары» байқауының мақсаты — қазақ ұлттық тағамдарын сақтап қалу және көпғасырлық дәстүрлерін насихаттау. Ұмытыла бастаған тағамдарды қайта жаңғырта отырып, жаңа заманауи тағамдарды әзірлеу. Байқауға Ақтөбе қаласының тұрғындары қатыса алады, сондай-ақ барлық меншік нысанындағы кәсіпорындар мен ұйымдардың өз асханаларында қызмет жасайтын аспаздарын қатыстыра алады. «Нео-фольклор» киімдер дизайнерлері байқауы қазақтың ұлттық киімдерінің бірегей құндылықтарына, оның қазіргі сән үлгісінің үрдістер үйлесімділігіне сәйкес этникалық-тұрмыстық құндылығы мен алуандылығына назар аудартуды көздейді. Байқауға кәсіби модельерлер, киім дизайнерлері, киім тігетін шығармашылық орталықтар, шығармашылық ұжымдар, декоративті-қолданбалы өнер шеберлері, орта арнаулы  және жоғары оқу орындарының оқушылары мен педагогтардан тұратын шығармашыл мамандары, жалпы білім беретін мектептер, сән орталықтары мен театрлар, ұлттық киіммен айналысатын мамандар қатыса алады. Байқаулардың қалалық кезеңі 27 сәуір күні өтеді. Байқауға қатысу үшін өтініштер 2016 жылдың 15 сәуіріне дейін, Ақтөбе қаласы, Т.Ахтанов көшесі, 50 (27-кабинет) мекенжайы бойынша қабылданады.  Қалалық кезеңдегі байқаудың жеңімпаздары І, ІІ және ІІІ дәрежелі дипломдарымен, бағалы сыйлықтармен марапатталып, облыстық кезеңге жолданады. Сатыбалды Сәуірбай. Дерек, фото: egemen.kz