Іс тетігін іскерлік шешеді

Кеше Ақтауда «Нұр Отан» халықтық-де­мо­к­ратиялық пар­тиясы Маңғыстау облыстық фи­лиалының кезектен тыс ХІІ партия кон­фе­рен­циясы болып өтті. Оған «Нұр Отан» ХДП Төрағасының бірінші орынбасары Нұрлан Нығматулин қатысып сөз сөйледі. Конференция жұмысына пар­тия­ның облыстық филиалы саяси кеңесінің мүшелері, партия активі, жергілікті мәслихаттардағы пар­тия фракциясының депутат­та­ры, партия ардагерлері, «Жас Отан» жастар қанатының белсенділері, рес­пуб­ликалық, жергілікті ақпарат құ­ралдарының өкілдері қатысты. Алқалы басқосуда «Нұр Отан» ХДП Маңғыстау облыстық фи­лиа­лы­ның төрағасы, облыс әкі­мі Қы­рым­бек Көшербаев «Пар­тияның 2020 жылға дейінгі бағ­дарла­ма­сының жобасы және Маң­ғыстау облысының әлеумет­тік-эконо­микалық даму ба­ғыт­тары туралы» баяндама жасады. Тәуелсіз Қазақстанның Тұң­ғыш Президенті, партия Төраға­сы Нұр­сұлтан Назарбаевтың 2020 жылға дейінгі даму жоспарында және 2010-2014 жылдарға арнал­ған үде­мелі индустриялық-инно­вациялық бағдарламасында көр­се­тілген ре­фор­маларды іске асы­ру – ел эко­номикасын бәсекеге қабілетті етіп, қоғам өмірін жа­ңар­туға тың серпін, жаңа мүм­кіндіктер беріп отыр. Ал «Нұр Отан» ХДП Қазақстан халқын жаңа да жауапты міндеттерді орындауға жұмылдыруда шешуші рөл атқаруда, деп бастады өз сөзін филиал төрағасы. Бағдарлама жобасында көрсетілген негізгі ба­ғыттар мен басты міндеттердің тиімді іске асуы өлкедегі эко­но­миканы үдемелі әртараптандыру, әлеуметтік саланы жаңа сапалық деңгейге көтеру, адами әлеуетті дамыту, жастарды жаңғыртудың қозғаушы күші ретінде жұмыл­дыру, сондай-ақ инновациялық технологияларды енгізуді нақты жүзеге асырумен байланысты екендігі белгілі. Оны облыс өмі­рінен анық көруге болады. Оған дәлел бізде өткен жылы да тұрақтылық пен экономикалық ілгерілеу сақталды. Негізгі ма­кро­экономикалық көрсеткіштер бой­ынша республикадағы маңдайал­ды үш аймақтың қатарындамыз. Жалпы аймақтық өнім адам басына шаққанда 17 мың АҚШ долларын құраса, бұл – еліміздегі екінші көрсеткіш. Ал даму қар­қыны жыл қорытындысында 102 %-ды құрады. Өнеркәсіп өнімі соңғы үш жылда екі есе өсті. Өнеркәсіптің өңдеу секторын­дағы өсу 50 пайызды құрады. Бұл өңірдің экономикасын әртарап­тан­дырудың нақты нәтижесі. Өт­кен жылы еліміздің индустрия­ландыру картасына жалпы со­ма­сы 38 млрд. теңге болатын 9 жоба іске қосылып, 1,5 мың жаңа жұ­мыс орны ашылды. Өткен жылы жергілікті бюджет қара­жатын пайдалана отырып, 1200 үлес­кер­дің мәселесі оң шешілді. Кәсіп­керлік саласы да белсенді дами түсуде. Яғни, бұл сала қызмет­керлері саны алдыңғы жылмен салыстырғанда 16,3 пайызға өсіп, кәсіпкерлік нысан­дар өндіретін өнім көлемі 2 есе ұлғайтылды. Қырымбек Елеуұлы осы айтқан мәселелердің ойдағыдай жүзеге асуының ел еңсесін көте­ре түсудегі рөлін қалың бұқараға түсіндіру мен насихаттауда, со­ны­мен қатар, өндіріс орын­дарының салыну барысына, мерзімінде іске қосылуына, оларға бөлінген мемлекет қаржысының мақсатты жұмсалуына партия­ның белсене араласқандығын атап көрсетті. «Нұр Отан» партиясының басты мақсаттарының бірі хал­қымыздың әл-ауқатын, әлеумет­тік жағдайларын, жалпы өмір сүру сапасын жақсарта беруге барлық саяси-бұқаралық әлеуетті жұмылдыру екендігі сөзсіз, деп жалғады сөзін Қ.Көшербаев. Бұл бағытта Елбасының халыққа Жолдауының «Адам – елдің басты байлығы» атты тарауын басшылыққа алып, көптеген игі шараларға, әлеуметтік маңызы зор акцияларға ұйытқы болдық. Соның нәтижесінде өткен жылы партияның тікелей мұрындық болуымен әлеуметтік акциялар аясында 248 шара өтіп, оған 40 мыңнан астам адам қатысты. Ел тәуелсіздігінің 20 жылдығы қарсаңында халық батырлары Иса-Досан көтерілісінің 140 жылдығы кең көлемде аталып өтті. Оларға еңселі ескерткіш қойылды. Осының бәрі 200-ден астам бастауыш ұйымдары, 30 мыңға тарта мүшесі бар «Нұр Отан» партиясының халықпен біте қайнасып, іс тетігін іскерлікпен шешудегі жұмыстарының бір парасы, деді филиал төрағасы. Конференцияда сондай-ақ об­лыс­тық филиал бақылау-тексеру комиссиясының төрағасы Ә.Са­химовтың есебі тыңдалды. Баян­дамаларды талқылауға қатысқан делегаттар, белгілі кәсіпкер, об­лыстық мәслихаттың депутаты Б.Жүсіпов шағын бизнесті дамы­ту мен қазақстандық үлесті көбейтудің, партияның Жаңаөзен қалалық филиалы төрағасының бірінші орынбасары К.Қызанбаев Елбасы қамқорлығымен Үкі­меттің қаланы көркейтуге арнал­ған үшжылдық бағдар­ла­масының мән-маңызына тоқтал­са, облыс­тық халық келісімі бірлестігінің төрағасы Ю.Шахшаев Қазақстан халқы Ассам­блеясы этномәдени бірлес­тік­терінің «Нұр Отанмен» бірлесе атқарудағы жұмыстарын жоғары бағалады. Ал басқа сөз алғандар Тәуелсіз Қазақстанның Тұңғыш Президенті, әлем таныған сарабдал саясаткер Нұрсұлтан На­зар­баевтың ел алдындағы өлшеусіз еңбегі жайлы әсерлі әңгімеледі. Конференцияда «Нұр Отан» ХДП Төрағасының бірінші орынбасары Нұрлан Нығматулин сөз алып, алда тұрған маңызды да жауапты жұмыстарға кеңінен тоқталды және партиялық жұ­мыстарда іскерлік танытып жүр­ген бір топ адамға «Белсенді қызметі үшін» омырау белгісін тапсырды. Конференцияда талқыланған мәселелер бойынша тиісті қаулы қабылданды. Конференцияда «Нұр Отан» ХДП Маңғыстау облыстық фи­лиалының төрағасы болып облыс әкімі Қырымбек Көшербаев сай­ланды. Сондай-ақ партияның қаңтар айында өтетін кезектен тыс ХІІІ съезіне делегаттар сай­ланды. Жоламан БОШАЛАҚ. Ақтау.