Солтүстік Қазақстанда 50,5 мың гектар жер мемлекетке қайтарылды

ПЕТРОПАВЛ. 14 сәуір. Қызылжар өңірінің прокуратурасы ауыл шаруашылығы мақсатындағы 50,5 мың гектар жерді мемлекет меншігіне қайтарды. Бұл туралы облыстық прокуратураның баспасөз қызметіне сілтеме жасаған egemen.kz тілшісі хабарлады. «Биыл жер заңнамаларын қолдану саласындағы заңдылықты сақтау бағытында прокурорлық қадағалау актілері бойынша жалпы кадастрлық құны 3,1 млрд теңгені құрайтын 50,5 мың гектар ауыл шаруашылығы мақсатындағы жер мемлекет меншігіне қайтарылды» делінген баспасөз хабарламасында. Аталған салада 6 тексеріс жүргізіліп, 93 заң бұрмалаушылық анықталды. 21 тұлға әкімшілік жауапкершілікке тартылды. Жер телімдерін жалға алушылардан бюджетке 10,5 млн теңге өндіріліп алынды. Өмір Есқали. Дерек: Солтүстік Қазақстан облыстық прокуратурасының баспасөз қызметі. Фото: egemen.kz.