Петропавлда «Қоғамдық бастамалар» жобасы белсенді жұмыс істеуде

ПЕТРОПАВЛ. 14 сәуір. «Қоғамдық келісім» коммуналдық мемлекеттік мекемес мен облыстық Қазақстан халқы Ассамблеясы жанынан «Мейірімді істер» атты топ құрылып, көмекке мұқтаж жандарға жәрдемдесуді басты мақсат етіп отыр. Бұл туралы egemen.kz тілшісі хабарлады. Облыс орталығында «Қоғамдық бастамалар» жобасы көп жылдан бері белсенді жүзеге асырылып келеді. Оның құрамындағы еріктілердің бастамашылдығымен жуырда «Мейірімді істер» атты топ ұйымдастырылып, алғашқы қайырымдылық шарасы мүмкіндігі шектеулі балалардың жағдайымен, тұрмысымен жақынырақ танысуға арналды. № 1 арнайы түзету мекемесінде бүлдіршіндерге ақ қағаздар мен шарлар беріліп, тілектер жазылды. Мұндай арт-терапиялық әдіс арқылы баланың ұшқыр қиялын дамытып, жалпы жағдайына оң әсер тигізуге болатынын психологтар дәлелдеген. Аталмыш топқа еріктілермен қатар «Нам слово» шығармашылық бірлестігінің өкілдері де тартылып, шағын концерт қойды. Ал Манаш Қозыбаев атындағы СҚМУ-нің студенттері психологиялық тренингтер өткізді. Ұйымдастырушылар бір реттік шарамен шектелмей, алдағы уақытта кең ауқымда өткізуді жоспарлап отыр. Өмір Есқали. Дерек: egemen.kz. Фото: voxpopuli.kz.