Ұрпақ рухын ұштаған кездесу

Қаламгердің шығармашы­лы­ғымен танысу, оның бала кез­дегі қызықтарын білу, өмір жолын­дағы, өнер жолындағы бас­палдақтарына терең үңілу – әдебиетке құмартқан әр адам үшін маңызды. Оқырман қауымды осы жағынан сүбелі сұхбаттармен сусындатып келе жатқан Ұлттық кітапханадағы «Әдеби мейман­жай» деп аталатын кездесу алаңының алар орны айрықша. Осын­дай сырға толы, жырға толы ке­ремет кездесудің бірі кеше  Мем­лекеттік сыйлықтың лауреаты, ақын Несіпбек Айтұлымен болды. «Өлең өнерімен әуестенуші жастарымыз баршылық. Алайда, шынайы, шын поэзияны жай ғана еліктеушіліктен айыра білу қажет-ақ. Әртүрлі, әр үндес ақындардың дүниеге келуі қуанышты. Мен Несіпбек өлеңдеріне осы тұрғы­дан қараймын. Өз жастығы мен жас творчествосына лайық үн аңғардым. Тілі жатық, ойы анық. Ағынан жарылып, таусыла талаптану, ізденіс бар. Қайсыбір жас­тарда ұшыраса бермейтін мүлде бір бөлек сарын еседі. Жасқанба, жас адам, жақсы-жақсы жырлар жаз!» деп кезінде ақиық ақын Мұқағали Мақатаев батасын берген Несіпбек Айтұлымен болған кездесудің әсері әсте бөлек болды деп ойлаймын. Кездесу басталған сәттен-ақ ақын толғана сөйлеп, төгіле сыр ақтарды. Өзінің өткен ізіне бір бұрыла қарап, бүгінгі болашақ ұрпақтың жай-күйін терең тебіреніспен саралады. «Сендер азаттықтың ақ кө­гер­шіндерісіңдер, тәуелсіз ел­дің ту ұстар ұландарысыңдар. Сондықтан, кітаптан қол үзбең­дер, кітап оқыңдар, қазақтың бай тілімен өздеріңді байыта түсіңдер. Елдің болашақ мұрат-мақсаты сендердің қолдарыңда. Рухани байлыққа ұмтылу керек. Іздену керек. Елдің тағдырына көз жүгіртіп, «Мен мемлекетіме не бердім», деген сұраққа жауап бере алатындай болу керек. Ол үшін тек қана оқу керек», – деп ақын келген жастарға ағалық ақылы мен жүрекжарды жанашырлығын жеткізді. Зиялы қауым өкілдері, мектеп оқушылары, колледж студенттері қатысқан кездесу «Бұл – кітап әлемі» айлығының аясында өткенін айта кетсек дейміз. Рауан ҚАЙДАР, «Егемен Қазақстан»