Ауылдағы жиһаз цехы

Оның бұйымдарын көрші аудан тұрғындары да сатып алуда Жақында Зайсан ауданының Қарабұлақ ауылында болғанымызда жиһаз цехының жұмысымен танысудың орайы келді. Ауыл әкімі Қамбар Шилібаев іскер азамат Қасым Жақинашевтің екі досымен бірге «Бизнестің жол картасы-2020» бағдарламасы бойынша 3 миллион теңге несие алып, оған қажетті құрал-жабдықтарды сатып алғанын, қазір жиһаздың түр-түрін шығарып жатқанын тілге тиек етті. Қасымды жұмыс орнынан жолық­тырдық. Аз сөйлеп, көп тыңдайтын азамат сауалдарға сараң жауап қайтарды. – Жандос Халитов, Жандос Тұра­ханов және мен 7 пайыздық үстемемен жеңілдетілген несие алдық. Ағаш тілетін станоктар Ресейдікі, ал жонылған тақтайлар мен плиталарды жер-жерден алып жатырмыз. Бастапқыда ісіміз алға басса жақсы, ал шығарған тауарларымыз өтпесе не істейміз деп қобалжығанымыз рас. «Көз қорқақ, қол батыр» деген рас екен, алғаш рет ауылдағы Абай атындағы орта мектептен 15 оқушылар партасын жасауға тапсырыс түсті. Тіпті, Сарытерек, Жарсу ауылдарындағы мектептерге үстел, орындық, шкаф жасап бердік. Сапасы жақсы, бағасы арзан жиһаз болған соң сатып алып жатқандар бар, – деп Қасым ағынан жарылды. Әдетте, облыс орталығынан жет­кізіл­ген жиһаздың бағасы Зайсанға жеткенше шырқап кететіні белгілі. Бірде Қасым өздері шығарған қабырға жиһазын аудан орталығындағы жиһаз сататын дүкенге апарып, бағасын 40 мың теңгеге бағалайды. Көздің жауын алатын жиһазды дүкен сатушысының басқа біреуге өз көзінше 80 мың теңгеге сатып жібергенін көргенде, өнімдерінің шын мәнінде сапалы екеніне көз жет­кізеді. Тіпті, Тарбағатай ауданының бірнеше мектебінен жиһаз жасауға тапсырыс түскені ауылдағы шеберхананың атағын алысқа жеткізгені сөзсіз. – Үстел, шкафтардың бағасын 15-18 мыңнан арттырмаймыз. Ауылдық жерде ақшаның тапшы екені белгілі. Ең бастысы, жерлестерімнің алғысын алсақ, одан артық  бақыт бар ма? – дейді жиһаз цехының жетекшісі Қасым ініміз. Қарабұлақ ауылында Гүлдана есімді кәсіпкер наубайхана ашып, үш адамды жұмыспен қамтамасыз етіп отыр екен. Ауыл тұрғындары Гүл­дана пісірген нанның дәмі керемет дейді. Таяуда ауыл әкімі Қамбар Шилібаевпен тілдескенімізде іскер азаматтардың тоғанда форель балығын өсіре бастағанын айтты. Оңдасын ЕЛУБАЙ, журналист Шығыс Қазақстан облысы, Зайсан ауданы Суретте:  Қасым Жақинашев жиһаз цехында