Елбасы Шымкенттегі «Азала текстиль» серіктестігінде болды

АСТАНА. 22 сәуір. Қазақстан Президенті Нұрсұлтан Назарбаев Оңтүстік Қазақстан облысының орталығындағы «Азала текстиль» жауапкершілігі шектеулі серіктестігінде болды. Бұл туралы akorda.kz-ке сілтеме жасаған egemen.kz тілшісі хабарлады. Елбасыға нысанда өңірдегі индустриялық даму бағдарламасының, «Оңтүстік» арнайы экономикалық аймағындағы инвестициялық бағдарламаның жүзеге асырылу барысы мен жеңіл өнеркәсіп нысандары қызметінің негізгі көрсеткіштері туралы баяндалды. Қазақстан Президенті фабрика жұмысымен және онда шығарылатын негізгі өнім түрлерімен танысты. Кәсіпорын еңбеккерлерімен әңгіме барысында Нұрсұлтан Назарбаев оларға жемісті жұмыс, кәсіби жетістіктер тіледі. Мемлекет басшысы өз өндірісін дамытып, импорттық тауарлар орнын алмастыру – Қазақстанның экономикалық саясатының маңызды міндетінің бірі екеніне назар аударды. Айта кетейік,«Азала текстиль» жобасы үдемелі индустриялық-инновациялық даму бағдарламасы аясында  2012-2014 жылдары жүзеге асырылды. Фабрика дайын өнім шығарудың шикі мақта өсіруден матаға дейінгі жабық циклін жүзеге асырып, 600-ге жуық адамды жұмыспен қамтамасыз етіп отыр. Талғат Райымбек. Дерек: akorda.kz. Фото: inform.kz.