• 23 Сәуір, 2016

Банк бөлімшесі жабылса

296 рет

көрсетілді

2 мин

оқу үшін

Egemen Qazaqstan

Қаражал қайтіп күн көрер? Қаражал қала мәртебесін 1963 жылы алды. Сол кезде қалада жалғыз ғана банк бөлімшесі жұмыс істеді. Ел егемендік алған тұста ол БТА банктің бөлімшесі болып қайта құрылды. Кейіннен бұл банк бөлімшесі жабылып, оның орнына «Казкоммерцбанк» АҚ-тың бөлімшесі ашылып, жағдайымыз тіпті де жақсара түскен болатын. Қала тұрғындары жалақысын, зейнетақысын, балалардың жәрдемақысын, Ұлы Отан соғысының ардагерлері мен тыл еңбеккерлері зейнетақыларын, «Өркен-Атасу» тау-кен комбинатының жұмысшылары еңбекақыларын осы банк бөлімшесінен алып жүр. Банк қызметкерлері жұмыстарына тиянақты, кішіпейіл, әдепті. Қаражал тұрғындары атынан алғыстан басқа айтарымыз жоқ. Енді осы «Казкоммерцбанк» АҚ бөлімшесін жоғарғы жақтағылар «жабамыз» деп хабар жіберіпті. Бұл Қаражал қаласы халқының басына жай түскендей әсер етті. Неге десеңіз, «Казкоммерцбанк» АҚ бөлімшесінен несие алдық, бизнес саласындағы қызметкерлердің есепшоттары бар, басқа банк жүйесіне ақша аударады, депозиттеріміз бар. Бұл банк бөлімшесі жабылса қай банкке барамыз? Қаражал қаласында екі банк бөлімшесі бар, бірі – осы «Казкоммерцбанк» АҚ, екіншісі «Халық банкі» АҚ. Жиырма мыңға жуық халқы бар Қаражал қаласына бір банк әлбетте аздық етеді. Клиенттеріне қызмет көрсетіп үлгере алмайды деп ойлаймыз. «Казкоммерцбанк» АҚ бөлімшесінен алған несиелерімізді қай банкке апарып төлейміз, депозиттерімізді қайда сақтаймыз? Облыс бойынша Қаражал ең шалғайда орналасқан қала – Жезқазған қаласы 300 шақырым, Қарағанды қаласы болса 420 шақырым қашықтықта. Қазіргі нарық қысып тұрған заманда Қаражал қаласында тұратын халықтың жағдайын кім ойлайды? Қаражал қаласында орналасқан «Казкоммерцбанк» АҚ бөлімшесінің жабылмауына кім септігін тигізе алар екен? Мұндағы елдің жанайқайына құлақ салар кім бар-ау? Ауданбай АСАНБАЕВ Қарағанды облысы