Кеше қазақтың өзге жұрттан кем болмай, тең болуын аңсап, сол жолға қызмет етуде жасындай жарқылдап, өзінің қысқа ғұмырын сарп еткен қазақтың ардақты ұлдарының бірі Смағұл Сәдуақасовтың рухы туған жеріне оралды.
Өткен жылдың соңғы нөмірінде «Егемен» Смағұл Сәдуақасовтың Мәскеудің «Донской монастыріндегі» қорымында 78 жыл бойы сақталған сүйегінің күлін қайтаруға қол жеткізілгенін қуанышпен жеткізген еді. Кенесарының басын таба алмай, Кейкіні қайтара алмай, ал көптеген басқа Алаш ардақтыларының сүйегінің өзі қайда қалғанын біле алмай жүргенде бұл шын мәніндегі қуанышты хабар еді.
Смағұл ағамыздың құтыға салынған күлі Дон шіркеуінің (қазір шіркеу болған) қабырғасына бітеп тасталғанын білген ұлтжанды азамат, белгілі қоғам қайраткері Сабыр Қасымов оны елге әкелу үшін қопарып алуға Мәскеу билігінен рұқсат алғанын аталмыш мақаламызда айтқан болатынбыз. Қазақстан билігі де бұл хабарға оң қабақпен қарап, ардақты ерді туған елге әкеліп, құрметпен жерлеуді ұйымдастыру жөнінде тапсырма берген болатын. Бірақ сол шараны тезірек ұйымдастыру жағы түрлі себептермен кешеуілдей берді. Еліміздің қоғам қайраткерлері, білікті азаматтар «беріп тұрғанда тезірек алып келу керек қой, ертең тағы бір бюрократтық кедергілер туып қалар» деп осыған қатты алаңдаушылық білдіріп жүретін. Сол себепті бастамашы топ құрылып, олар Смағұлдың күлін жолаушылар ұшағымен жеткізуді шешкен болатын. Қаңтардың 19-ында Мәскеуге баратын сегіз адамнан тұратын топ құрылды. Бірақ жағдайды екшей келе, мәселені күрделендірудің қажеті жоқ, сондықтан саяси қайраткерлердің баруы міндет емес, тек ғылым, БАҚ өкілдері және туыстарынан тұратын шағын топ барсын деген шешім қабылданды. Сөйтіп, белгілі смағұлтанушы ғалым, ұлтжанды азамат Дихан Қамзабекұлы бастаған төрт адам жолға шықтық. Олардың арасында Смағұлдың аталас ағайыны Қапар Айтуғанов ақсақал, асыл ердің туған жерінде «Жарқын» шаруа қожалығын құрып отырған кәсіпкер Ғимадедин Ожаров және осы жолдардың авторы болды.
Бізді Мәскеуде Қазақстан елшілігінің бірінші хатшысы, филология ғылымдарының докторы Серікқали Байменше қарсы алды. Ертесіне елшіліктің хабардар етуімен жиналған бір топ диаспора өкілдерімен бірге «Донской монастырьге» жол тарттық. Топ ішінде Мәскеу жәмиғи мешітіндегі қазақ қауымдастығының имам-хатибы Марат хазірет Аршабаев, қазақ мәдениеті «Мұрагер» ұйымының мүшесі Хайдар Құмарбеков ақсақал және осы ұйымнан Аманғали Ғұбайдуллин, Ақсайын Намазов, осында шығатын «Қазақ тілі» газетінің редакторы Орынбасар Қуандықов, елшілік қызметкерлері, «Қазақстан» мен «Хабар» телеарналарының мәскеулік тілшілері және т.б. болды.
Барлық монастырьлер сияқты «Дон» да биік дуалмен қоршалған екен. Оның аумағындағы бұрынғы крематорий қазір қайтадан шіркеуге айналдырылыпты. Ауласының қарын көңілді жұмыскерлер қауқылдасып жүріп, күреп жатыр. Айналаның бәрі бастарына үлкенді-кішілі крестер қойылған орыс молалары. Зират кеңсесі бір шағын ғимаратта екен, біздің келетінімізден алдын-ала хабардар болған оның бастығы С.Трифонов бізді орнында қарсы алды. Рәсімдік қағаздарды толтырып, «сақтағаны үшін» ақша төленген соң, ол Сабыр Қасымовтың сенімхатымен барған Дихан Қамзабекұлының қолына барлық құжаттарды ұстатты. Соның ішінде 1933 жылғы кремация туралы анықтама да жүр. Асығыс толтырылғаны көрініп тұр, жазбаларға қайта-қайта түзетулер енгізіліпті.
Міне, нағыз жан толқытар сәтке де жеттік. Осыдан 78 жыл бұрынғы оқиғаны Сәбеңнің жары Мәриям апай суреттеп айтқан жерге де келдік. Смағұлдың арбаға салынған мәйітінің соңында қайын атасы Әлихан Бөкейханов пен жары Елизавета Сәдуақасованың келе жатқанын еске алған еді ол. Сәбең олардың жанына барып, көңіл айтқанын да апамыз айтып кеткен. Біз де дәл сол жерде тұрмыз. Уа, дариға, қайран аумалы-төкпелі дүние-ай, десеңші. Енді сол оқиғадан 78 жыл өткенде Тәуелсіз Қазақстаннан келіп, арысымыздың күлін алып кеткелі тұрмыз...
Қазақ халқы тәуелсіздікке қол жеткізіп, өз билігі өз қолына көшкен ел болмаса Смағұлды кім іздегендей еді? Кезінде есімінің өзін ауызға алғызбай, алда-жалда айтып қалған адам болса жазаға ұшыратқан да кездер болды ғой. Сондағы Смағұлдың бар жазығы – елінің адамзат көшінен қалмауы жолында арпалысқандығы ғана.
Бәріміз шіркеудің ішіне ендік. Ол біршама кең екен, есіктің тура қарсысындағы төрде крематорийдің пеші болыпты. Осы жерге бұрын да келген Дихан Қамзабекұлы оған дейін темір рельстердің болғанын еске алды. Бірақ қазір ондай жоқ, пештің орнына образдар қойылып, ол жер шіркеудің төріне айналған.
Сол жақ бүйірінен шыққан бөлмеге ендік. Бұл дуалы ұзын, сопақтау бөлме екен. Барлық қабырғаларына адамдардың күлдері құтылармен қойылып, бергі беті шынымен жабылып, бітеліп тасталған. Күлдің кімдердікі екені құтыларда көрсетіліп тұр. Олардың өзі әртүрлі, кейбірінікі қарапайым, ал кейбірі мәрмәр тастан қашалыпты. Сондықтан оны туыстары мен достары жасатқаны білініп тұр. Смағұл ағамыздікі де мәрмәр тастан қашалып, оюлап жасалған дүние екен. Соған қарағанда, қайын атасы жасатса керек.
Марат хазірет марқұмның рух шәрифіне бағыштап құран оқыды және Алладан мәйіттің күлін алу ниетімізді қолдауын сұрап, бата қылды. Осыдан кейін ғана шіркеу қызметкері арнаулы аспаптармен беткі шыныны қопарды. Мәрмәр құты зілдей екен, Дихан мен Серікқали оны еппен жерге зорға түсірді. Орнына әдейі сол үшін Қазақстаннан жасатып әкелінген тақта-белгі қойылды. Онда: «Бұл жерде 1933-2011 жылдары Қазақстанның мемлекет және қоғам қайраткері, саяси репрессия құрбаны Смағұл Сәдуақасовтың сүйегінің күлі тұрды. Астана қаласына жерленді» деген сөздер қазақ-орыс тілдерінде жазылыпты.
Айта кететін жәйт, осы «Донской монастырьде» Ә.Бөкейханов, Н.Нұрмақов сияқты репрессия құрбаны болған арыстарымыздың да сүйегі көппен бірге «бауырластар зиратына» жерленіпті. «Олардың сүйегін анықтау мүмкін емес, тек осы жерге олардың есімдері жазылған бір тасбелгі орнатуымыз керек-ақ», дейді Серікқали Байменше.
Осы күні түнде Смағұлдың күлін елшілік қызметкерлерінің көмегімен ешқандай кедергісіз өзіміздің ұшаққа енгізе алдық. Астана әуежайында қазақтың қайсар ұлы Смағұлдың рухын қоғам, мәдениет, саясат қайраткерлері, БАҚ өкілдері мен студенттер қауымынан тұратын қалың топ зор салтанатпен қарсы алды. Әуежайдың үстінде күшейтілген дауыспен: «874-ші рейспен Мәскеуден қазақтың аса көрнекті мемлекет және қоғам қайраткері Смағұл Сәдуақасовтың рухы оралды» деп айтып тұрды. Көптеген адамдардың көздерінен жас шығып кеткендігінің куәсі болдық. Әуежайдың төменгі залында шағын митинг болып, онда Н.Ораз, Д.Қамзабекұлы, Н.Айтов, С.Негимов және басқалар сөз сөйледі. Осыдан кейін Смағұл Сәдуақасов сүйегінің күлі жерлеу мәселесі шешілгенше уақытша сақтауға белгіленген орынға жеткізілді.
Жақсыбай САМРАТ.
Астана – Мәскеу – Астана.