Президент оркестрі есеп берді

Жуырда Астанадағы «Қазақстан» концерт залында ел Тәуелсіздігінің 25 жылдығын мерекелеу аясында Қазақстан Республикасы Мемлекеттік күзет қызметінің құрылғанына 2 жыл толуына орай тамаша кеш болып өтті. Концертті Президенттік оркестр ән және эстрада ансамблінің бас­тығы, Қазақстанның еңбек сіңірген қайраткері Жанат Шыбықбаев үрмелі аспаптар оркестрінің сүйемелдеуімен А.Есмұханның «Отаным» атты танымал әнімен ашты. Қашанда өз тың­дармандарын қайталанбас репертуарымен таңғалдырып келген ҚР МКҚ шығармашылық ұжымы бұл жолы да Президенттік оркестр музы­канттарының авторлығындағы тың туындыларымен қуантты. Концертте тұсауы кесілген «Ақберен» күйін де халық ерекше ықыласпен қабылдады. Композиция авторы Президенттік оркестр халықтық музыка ансамблінің домбырашысы, композитор Бақытжан Дүйсенғазиев. Оған «Ұлы дала» күйін қо­сыңыз. Аталған шығарма авторы – Прези­денттік оркестр халықтық музыка ан­самблінің жетекші солисі, домбырашы Жандос Мұхтаров. Бұл күй өткен жылы Мем­лекет басшысының идея­сын қолдау мақсатында туындаған болатын. «Ұлы Дала» атауы мен сарыны қазақ даласының шексіздігін, біздің атамекеннің өткені мен бүгінгісін, болашағын көрсетеді. Осы күйдің сүйе­мелдеуімен Президенттік ор­кес­трдің би ансамблі алғаш рет Талантбек Шоруков пен Мәдина Әлиева-Шору­кова жаңа қойылымын орындады. Кеш барысында құрама оркестрдің сүйемелдеуімен Президенттік оркес­трдің солистері, Қазақ­станның еңбек сіңірген қай­рат­керлері Ардақ Бала­жано­ва, Досымжан Таңатаров, ха­лықаралық және республикалық конкурстардың лауреаттары Нұрболат Құсайынов, Қайбар Аллажар, Әсел Мәдекешова, Бибігүл Сауытова, Айман Уда­нова, Әлібек Ізбасаров, Гүл­саным Жұмағалиеваның және басқалардың орындауында отандық және шетелдік ком­позиторлардың шығармалары шырқалды. Раушан ТӘУІРХАНҚЫЗЫ, «Егемен Қазақстан»