Күдіктілер киіктің мүйізімен қолға түсті

ҚАРАҒАНДЫ. 26 сәуір. Қарағанды облысында «Қызыл кітапқа» енген киіктің мүйізін әкетіп бара жатқан бес адамды полиция қызметкерлері ұстады. Бұл туралы облыстық ішкі істер департаментінің баспасөз қызметіне сілтеме жасаған  egemen.kz  тілшісі хабарлады. Жамбыл облыстық ішкі істер департаменті және Нұра аудандық ішкі істер басқармасы жергілікті полиция қызметіне қарасты табиғатты қорғау полициясы «Охотзоопром» мекемесінің инспекторларымен бірігіп өткізген «Нерест» жедел-іздестіру шаралары кезінде Жанбөбек елді мекенінің маңында «НИВА» автокөлігін тоқтатып, тексеру жүргізді. Тексеру барысында Астана қаласының 34 жастағы тұрғыны мен Жамбыл облысының жас шамалары 27 мен 43-тің аралығындағы төрт ер адам мінген көлік ішінен киіктің 22 мүйізі табылды. Қазіргі уақытта сотқа дейінгі тергеу амалдары жүргізілу үстінде. Қайрат Әбілдинов. Дерек, фото: Қарағанды облыстық ішкі істер департаментінің баспасөз қызметі.