Әскери жәдігерлер әсері

Астанадағы Әскери-тарихи музейде әлемдік деңгейдегі Стокгольм қаласы Армия музейінің «Өмір мен өлім арасындағы заттар» атты көрмесінің ашылу салтанаты өтті. Көрме 2010 жылы сол жылдың үздік эстетикалық жобасы ретінде «Алтын витрина» жүлдесіне ие болған еді. Сонымен қатар, Швеция, Норвегия, Бельгия, Польша, Беларусь және Эстония елдерінде кеңінен танылған екен.  Аталған жылжымалы көрме бү­гінгі таңда Армия музейінің әлем­дік деңгейдегі ең үздік жобасы болып табылады. Көрменің ерек­шелігі сол, мұнда қару-жарақ атымен жоқ. Экспонаттардың дені – күнделікті тұрмыста, яғни соғыс­тарда тұтынылған заттар: ыдыс-аяқ, құрал-сайман, асай-мүсейлер. Бір қарағанда, жай заттар секілді көрінетін бұл құнды дүниелердің астарында небір бұлтартпас шындық пен тарих ақиқаты жатыр. Соғыс сұрапылында отбасынан жырақта жүрген жауын­гер­дің ең қымбат та қасиетті жәдігер бойтұмарларымен осы әске­ри көрмеде ғана таныса аласыз. Ұйым­дастырылып жатқан шара халық­аралық деңгейдегі әскери-тарихи музейлермен жақсы қарым-қаты­нас орнатып, алдағы уақытта тәжі­рибе алмасуға көптен-көп септігін тигізбек. Сондай-ақ, көрменің ашылу салтанатына Қорғаныс министрлігінің басшылары, ғылым мен мәдениет, қоғам қайраткерлері, стокгольмдік армия музейінің директоры Ева-Софи Эрнстелл және Астана қаласындағы дипломатиялық корпустар өкілдері қатысып, пайымды пікір, ұтқыр ұсыныстарымен бөлісті. 522 экспонат қойылған көрме 2016 жылдың 15 қазанына дейін жалғасады. Раушан ТӘУІРХАНҚЫЗЫ, «Егемен Қазақстан»