• 30 Сәуір, 2016

Ұлттың тіні – тілі

430 рет

көрсетілді

1 мин

оқу үшін

Egemen Qazaqstan

Астананың Жастар театрында Тәуелсіздігіміздің 25 жылдығына арналған «Тіл тұғыры – ел тұғыры» атты мерекелік сазды кеш өтті. Қазақстан халқының бірлігі күні қарсаңында ұйымдастырылған іс-шараның ұйытқысы қалалық тіл басқармасының басшысы Тілеуғали Қышқашбаев көпшілік алдында сөйлеген сөзінде бұл бағдарламаның басты мақсаты ата-бабаларымыз ғасырлар бойы аңсап, бүгінгі ұрпақ қол жеткізген азаттығымызды, егемен еліміздің баға жетпес байлығы – ұлтаралық татулықты ұлықтау екендігін, осы орайда мемлекеттік тіліміздің мәртебесін өсіруге айрықша мән беріліп отырғандығын, өйткені, туған тіліміздің тұғырын биіктету елдігіміздің ажырамас бөлігіне айналғанын атап көрсетті. Көрермен көңілінен шыққан концертте Ардақ Балажанова, Тамара Асар, Анар Мұздаханова, Ибрагим Ескендір секілді сахна саңлақтары ән шырқап, күй күмбірлетті. Жиналған жұрт, әсіресе, Шаһризат Сейдахмет, Эльдана Габерман және Татьяна Ким үш тілде орындаған көрнекті композиторымыз Шәмші Қалдаяқовтың әндерін өте жылы қабылдады. Талғат БАТЫРХАН, «Егемен Қазақстан»