«Сарбаз» сапарға әзір

Әскери мақсаттағы отандық кеме жасау өндірісі жаңа сапалық кезеңге аяқ бас­ты. Бұл тұжырымға Орал қаласындағы «Зенит» зауытында құрастырылған салмағы 250 тонна ракеталық-артиллериялық ко­­раб­ль куә. Оны жасауға 200-ден астам маман тартылған. Аталған корабльдің бұған де­йінгі өндіріс желісінен суға түсірілген кемелермен са­лыс­­тырғандағы басты айыр­ма­шы­лығы, өз атауынан көрініп тұр­­ғанындай, ең соңғы үлгідегі ар­тиллериялық құрылғымен жаб­дық­талғаны әрі жауынгерлік мо­дульдер мен радиотехникалық қарулар орнатылғаны. Еліміздегі шекара қыз­метінің сұранысына сәйкес құрас­ты­рылған кемеге  «Сарбаз» деген атау қойылған. Шекаралық ко­рабльдің ұзындығы 42 метр болса, ені 7 метрге дейін жетеді. Отан­­­дық кеме құрастырушылар ТМД аумағында баламасы жоқ өздерінің бұл инженерлік-конс­трукторлық еңбегі мен өнімін Тәуелсіздіктің 25 жылдығына арнап отыр. Бұл – реттік саны бо­йынша «Зениттен»  Каспийге мемлекетіміздің теңіздегі мүд­де­лерін қорғауға аттанатын 24-ші корабль. «Бүгінгі күн – мем­лекетіміздің айбынын асыра ала­тын тарихи күн. Сондық­тан, «Сар­баз» кемесімен теңіз­ге ат­­­­тан­ғалы отырған шекара сақ­шыларына ақ жол тілеймін», – деді кеменің Шаған өзеніне түсірілу рәсімі кезінде Батыс Қа­зақ­­­стан облысының әкімі Алтай Көлгінов. «Зауыт мамандарының қолы­нан шыққан жаңа корабльдің атқаратын қызметін тек теңіздегі шекараны қорғаумен шектей салуға болмайды. Сонымен бірге, бұл бесаспап кеменің қосым­ша құрылғылары. Салмағы 170 тон­наға дейінгі ауыр жүктерді тасымалдауға да мүмкіндіктер туғызады. Әрине, бұл – біз үшін үлкен жетістік. Осындай күрделі міндетті игере алғанымыз үлкен мерей. Кеме өндірісін одан әрі жаң­ғырту жөніндегі жоба аясында бұдан да жоғары сыныптағы корабльдер құрылысын меңгеруді, салмағы 600 тоннаға дейінгі ма­мандандырылған кемелер мен жүзу құралдарын шығаруды ойластырып отырмыз», – деді газет тілшісіне зауыт директоры Вячеслав Валиев. Еліміздің шекаралық қыз­меті бас штабы жағалау күзеті бас­­қармасының бастығы Са­быр Хасановтың айтуынша, ел Президенті қол қойған мем­лекеттік шекараны дамыту мен бекемдеу жөніндегі кешенді жоспарға сәйкес, 2018 жылға дейін «Сарбаз» үлгісіндегі тағы да бірнеше корабль мен жылдам жүзетін ұшқыр катерлер құрастырылмақ. Мұның өзі Каспий теңізіндегі еліміздің қауіпсіздігін күшейтуге елеулі септігін тигізбек. Мұның бә­рі негізінен зениттіктердің кү­шімен атқарылмақ. Осы ара­да олар теңіздегі шекара қыз­метінде жүрген корабльдерге әртүрлі техникалық қызметтер көрсететінін де айта кеткен жөн. Сонымен, «Сарбаз» суға тү­сірілді. Бұдан әрі ол Жайық өзені арқылы Каспий теңізіне қарай бағыт алмақ. Ендеше, іске сәт демекпіз. Темір ҚҰСАЙЫН, «Егемен Қазақстан»  ОРАЛ Суретте: «Сарбаз» әскери ке­месі