Петропавлда «Халық маркасы» жобасы таныстырылды

ПЕТРОПАВЛ. 3 мамыр. Солтүстік Қазақстан облысында жергілікті кәсіпкерлерге «Халық маркасы» жобасы таныстырылды. Бұл туралы туризм және кәсіпкерлік басқарамасының баспасөз қызметіне сілтеме жасаған egemen.kz тілшісі хабарлады. Астана қаласынан арнайы келген «Халық маркасы» жобасының авторы Римма Тәжібаева жергілікті кәсіпкерлермен кездесіп, отандық тауар өндірушілерді қолдау мақсатында ұйымдастырылатын жәрмеңке-көрменің өткізілу барысына кеңінен тоқталды. Жобаның басты мақсаты – отандық тауар өндірушілерді қолдау және өз өніміміздің бәсекеге қабілеттілігін арттыру. Римма Тәжібаеваның айтуынша, үстіміздегі жылдың 6 шілдесі күні Астана қаласында Мемлекет басшысының қатысуымен жәрмеңке-көрме өтеді. Отандық кәсіпкерлердің фармацевтика, тұрмыстық заттар мен туризм, азық-түлік, қолөнер бұйымдары бойынша 7 секцияда өз өнімдерін жұртшылық назарына ұсынуға мүмкіндіктері бар. Қатысуға ниетті компаниялар «Халық маркасы» белгісін алуы тиіс. Жәрмеңке-көрмеде сатылатын өнімдер қазақстандық тұтынушыларға қолжетімді болмақ. Көрме бір жыл бойы өтеді. Солтүстікқазақстандық кәсіпкерлерді көрмеге шақыра келген жоба авторы бүгінгі таңда біздің өңірден 50 компания бұл шараға ынта білдіргенін, негізінен, жеңіл өнеркәсіп пен азық-түлік өнімдерін өндіретін, жиһаз жасаумен айналысатын компаниялар тарапынан қызығушылық басым екенін жеткізді. Өмір Есқали. Дерек: Солтүстік Қазақстан облысы туризм және кәсіпкерлік басқармасының баспасөз қызметі. Фото: etoday.kz.