Апаттың себебі зерделенуде

Қаңтардың сақылдаған сары аязында жұртты әбігерге салған Ша­рын өзені бүгін өз арнасына түсіп, жайлана ағып жатыр. Әрине, ауыл тұрғындары жапа шекті, «өз үйі, өлең төсегін» тастауға мәжбүр болды. Десек те шарындықтарға кө­мек дер кезінде көрсетіліп, құт­қару шаралары жұмылдырылды. Шарын ауылына 21 қаңтар күні Премьер-Министрдің бірінші орын­басары Өмірзақ Шөкеев келіп, апат­тың орын алуына себепкер болған Шарын өзеніндегі темір жол көпірі құрылысы жүр­гізілген қосалқы  арна жұмысы­мен танысты. Елді мекенді мұз­дан тазарту, жағаны бекітуге об­лыс бюджетінен бөлінген 30 млн. теңгеге қосымша ауданнан 60 млн. теңге қаржы қарастырылған. Үкімет басшысының орынба­са­ры жасалып жатқан дамбаны кө­ріп, апаттың себеп-салдарын та­ра­зылады. Су шайған тұрғын үйлерді аралап, халықпен пікірлескен Өмірзақ Шөкеев, республикалық комиссия мүшелері, облыс әкімі Серік Үм­бетов, жергілікті тұрғындардың қа­тысуымен кеңес өткізіп, оқиға егжей-тегжейлі тексеріліп, айып­ты­лар жазаланатынын, басқа да өті­ніш-тілектер өңір басшысымен бірлесе шешілетініне сендірді. Жиында осы оқиғаның басын­да жүрген облыс әкімінің бірінші орынбасары Амандық Баталов 7 үй ағымдағы, 1 үйге күр­делі жөндеу жұмыстары жүргі­зіле­ті­нін жеткізді. Су кірген шеткі көшелердегі 243 үйдің ауласы мен көшелері мұздан толық тазартыл­са, т­ұрғындарға 104 тонна көмір, 40 текше метр отын, 118 қап ұн, 400-ге жуық етік, күртеше, 2 тонна құс еті мен тағы басқа қажеттіліктер берілген. Бұдан кейін Ө.Шөкеев Балқаш ауданындағы «Динара-Ранчо» ЖШС-дегі асыл тұқымды мал шаруа­шылығының етті бағыттағы герефорд тұқымы мен қазақтың ақбас сиырын өсірудегі тиімді жо­баның іске асырылуымен танысты. Мұндағы бір бұқаның сал­мағы 1 тонна 200 кило. Өндірістік кооператив ауыл халқын жұмыс­пен қамтумен қатар құс өсіруді де қолға алған. «Динара Ранчо» кооперативін аралаған жұмыс тобы ірі қара етінің экспорттық әлеуетін арттыру тақырыбында аймақтық семинар өткізіп, асыл тұқымды мал өсіру, етті экс­порттау, қаржыландыру жөніндегі түйінді мәселелерді ортаға салды. Күмісжан БАЙЖАН, Алматы облысы.