Соңғы кездері «жігіттің көбі әскерге жарамсыз» немесе «әскерге барғысы келмейді», «Отан алдындағы парызын өтеуге құлшыныс жоқ», деген сыңайлы әңгімелер жиі айтылып жүр. Тіпті, «сол үшін әскерден жалтарғандарға жазаны да күшейтіпті» дегенді де естідік. Шынымен, солай ма? Жалпы, көктемгі әскерге шақыру науқаны қалай болып жатыр?
Бұл сұрақтарды Қазақстан Республикасы Қарулы Күштері Бас штабы Ұйымдастыру-жұмылдыру жұмыстары департаменті бастығының орынбасары – жасақтау басқармасының бастығы Амантай ӨСЕРБАЕВҚА жолдаған едік.
– Амантай Сламжанұлы, елімізде қазір жас азаматтарды көктемгі мерзімді әскери қызметке шақыру жүріп жатқаны белгілі. Осы жұмыстың бүгінге дейінгі қорытындысымен бөліссеңіз.
– 2016 жылдың 1 сәуірінде еліміздің барлық өңірлерінде 18 бен 27 жас аралығындағы жас азаматтарды мерзімді әскери қызметке шақыру басталды. Көктемгі шақыру науқаны маусым айына дейін жалғасатынын айта кетейік. Яғни, нақты қорытындысын айту үшін науқан әлі аяқталған жоқ. 1 сәуір мен 3 мамыр аралығында келіп түскен мәліметке сәйкес, 9 мыңға жуық әскерге шақырылушыдан іріктеліп, әскерге 3500-ге жуық азамат шақырылды. 500-ге жуық әскерге шақырылушы жарамсыз деп танылды. 1000-ға жуық азамат кейінге қалдырылды. Іріктеудің барлық кезеңінен өткен 3500-ге жуық жаңадан шақыртылған бозбала әскери бөлімдерге жөнелтілді. Оның ішінде Ұлттық қауіпсіздік комитеті Шекара қызметіне – 2500, Қарулы Күштерге – 700, Мемлекеттік күзет қызметіне 300-ге жуық азамат іріктелді.
– Әскерге шақырту алатын 18 бен 27 жастағы азаматтардың арасында әскерге өтетіндер көбіне 20-21-дегілер. Мәселен, 27 жастағы жігіттің «әскерге кетіп бара жатырмын» дегенін естімеппін. Осындайда жалпы әскерге шақыру жасын 27 емес, одан гөрі төмендетуге болмас па еді деген ой келеді. Бұлай деуіме бір себеп, жасында жарамсыз болған жігіт, жасы ұлғайғанда да жарамды болуы екіталай ғой. Қайта, осы жасы ұлғайғандар комиссиядан өтуге уақытында келмей, біраз мәселе туындап жатады. Көбісінің жұмысбасты немесе балалы-шағалы болатыны тағы бар.
– Сіздің «әскерге шақыру жасын 27-ге дейін емес, одан гөрі төмендетуге болмас па еді» деген пікіріңізге тоқталсам, әскерге шақырылатын азаматтардың жас аралығы «Әскери қызмет пен әскери қызметшілердің мәртебесі туралы» Қазақстан Республикасының заңына сәйкес бекітілген. Бүгінде әскерге шақырылушының жасын төмендету мәселесі қарастырылып жатыр. Өздеріңіз білесіздер, көбіне-көп 20-21 жастағы жігіттер іріктеліп алынады. Мәселен, 22 жастан асқан іріктеуден өте алмай, әскерге қабылданбай қалған азаматтар ақылы түрде әскери даярлықтан өтіп, әскери билет алуға болады. Мұндай да мүмкіндіктер қарастырылған.
– Қазіргі күні әскерден жалтаратындар көп пе? Өзіңіз білетіндей, өткен жылдан бері әскерден жалтарғандарға жаза күшейді. Осы жайында кеңірек тоқталсаңыз?
– Қазіргі уақытта шақырту пунктіне өз еркімен келушілердің саны күннен-күнге арта түскенін зор қуанышпен айта аламыз. Әскерден әртүрлі әлеуметтік немесе жеке басының мәселесі бойынша жалтарып, жергілікті әскери басқару органдарында есепке алу қағидаттарын бұзғандар бар, әрине. Алайда, әскери қызметтен жалтарғандар жауапқа тартылатын болады. Әскери қызметтен жалтару мың айлық есептік көрсеткіш мөлшерінде айыппұл төлеумен, не осындай мөлшердегі түзеу жұмыстарымен, немесе бір жылға дейін бостандықты шектеумен, не осындай мерзімге бостандықтан айырумен жазаланады. Егер әскерге шақырылушы тергеу органы істі сотқа өткізгенге дейін өз еркімен әскерге шақыру пунктіне келсе, онда ол қылмыстық жауапкершіліктен босатылады. Әскери қызметтен босатуға заңды себептері болмай жалтарған азаматтарға мың айлық есептік көрсеткіш көлемінде айыппұл салынады немесе еңбекпен түзету жұмыстарына жіберіледі, тіпті бір жылға бас бостандығынан айырылуы мүмкін.
– Өткен жылдан бері қанша жігітке әскерден жалтарғаны үшін айыппұл салынды?
– Өткен жылы есепке алу қағидатын бұзып, уақытында жергілікті тіркелген жері бойынша шақыру пунктіне келмегені үшін 5 мыңға жуық азаматқа айыппұл салынды. Алайда, ескерту, түсіндіру бағытында профилактикалық жұмыстар атқарылып жатыр.
– Естуімізше, қазіргі күні әскердегі жағдай бұрынғыдай емес, әлдеқайда жақсарған әрі мерзімі де бір жыл ғана. Оған қоса, әскерге барып келгендерге де елімізде ерекшеліктер бар. Мәселен, жұмысқа орналасуына да артықшылықтар қарастырылған. Ал соған қарамастан, әскерге барғысы келмейтіндер аз емес. Мүмкін мұның бір себебі әскердегі қазіргі жағдай туралы насихат жұмыстарының аздығы болар?
–«Әскерге барғысы келмейтіндер аз емес» деген пікіріңізге келіспеймін. Керісінше, жылдан-жылға Отан алдындағы парызын өтеймін деген жастардың саны артып келеді. Сөзімнің дәлелі ретінде айтайын, әскерге шақыру пункттеріне барып көріңізші, іріктеуден, медициналық комиссиядан өтіп, әскерге қабылдансам деген жастардың ұмтылысын көріп, өзіңіз де бұл сөзіме куә боласыз. Қазақстан Республикасы Конституциясының 36-бабына сәйкес «Қазақстан Республикасын қорғау – оның әр азаматының қасиетті борышы» болып табылады. Әскерге барып-келгендерге заң бойынша ешқандай артықшылықтар қарастырылмаған. Алайда, әскери билеті бар азаматтарға қызметке орналасу әлдеқайда жеңіл келеді.
Әскерге шақыру барысында жергілікті атқарушы органдар жергілікті әскери басқару органдарымен, әскери бөлімдермен бірлесіп, жалпы білім беру мекемелерінде Қарулы Күштердің мәртебесін арттыруға және әскери қызметті насихаттауға бағытталған әскери-патриоттық іс-шаралар өткізілуде. Соның ішінде, «Әскерге шақырылушы күні», «Жас әскер күні», «Ерлік сабақтары» сияқты бірнеше акциялар ұйымдастырылды.
Бүгінде жастардың әскери борышын өтеуге деген ұмтылысын арттыру мақсатында барлық мектептерде өтетін алғашқы әскери дайындық сабағы әскери бөлімдермен, әскери қызметшілермен өзара тығыз байланыста жүргізіледі. Қару-жарақ түрлері таныстырылып, жауынгерлік даярлық сабақтары өткізіледі. Мұның бәрі бозбалалардың қызығушылығын арттыра түсуде.
– Отан қорғаушы күніне орай қандай шаралар ұйымдастырылуда?
– 7 мамыр – Отан қорғаушы күніне орай Қорғаныс министрлігінің бастамасымен ауқымды әскери-патриоттық және мәдени-бұқаралық шаралар өтеді. Атап айтқанда, еліміздің барлық өңірінде әскери салтанатты сапқа тұру, «Мәңгілік Ел тұғыры – қуатты Армия!» тақырыбында ашық есік күндері, Қарулы Күштер әскери қызметшілерінің қатысуымен өтетін ерлік сабақтары, Қорғаныс министрлігі Орталық оркестрінің көрсетілімі, мерекелік концерттер және өзге де ауқымды мерекелік іс-шаралар жоспарлануда.
Әңгімелескен
Динара БІТІКОВА,
«Егемен Қазақстан»