Оңтүстік Қазақстан облысында майдангерге құрмет көрсетілді

ШЫМКЕНТ. 12 мамыр. Оңтүстік Қазақстан облысының әкімі Бейбіт Атамқұловтан бастап мемлекеттік қызметкерлер қарт майдангерлердің үйіне барып құттықтады. Бұл туралы egemen.kz тілшісі хабарлады. Солардың бірі Ұлы Отан соғысының мүгедегі Шамиль Латыев сұрапыл жылдары 3-ші Беларус, Батыс фронттарында болып, түрлі жарақаттар алып, қан майданнан ІІ топ мүгедегі болып оралды. Соғыс жылдарынан соң №51 Буденовский жылқы зауытына жұмысқа шақырылған ол құрылыс техникумын аяқтап, партиялық мектебіне түсті, совхоз директоры орынбасарының қызметін атқарды. 1969 жылы Чапаев қаласына шақырылып, прораб жұмысынан бастап ПМК-63 ТРЕСТ «Уральск-Водстрой» партия ұйымының хатшысы болып жұмыс істеді. Соңғы қызметі Уральск қаласында ТРЕСТ «Уральск-Водстрой» сатып алу бөлімінің бастығы болды. Тоқсанды орталаған қарт майдангер бүгінде немере, шөбере шуағына бөленіп отыр. Қазір «бұл соғыстың қазаққа керегі жоқ еді» деп әр қиырға салатындар бар болғанымен сұрапыл соғыстың өртін көрген жауынгерлердің фашизм дертінен сақтап қалғанын ұмытпаған жөн. Бақтияр Тайжан. Дерек, фото: egemen.kz