«Астана арландары»

жартылай финалдан аса алмады Бүкіләлемдік бокс сериясында (WSB) ел намысын қорғайтын «Астана арландары» биылғы маусымды жартылай финалмен аяқтады. Ұлыбритания астанасы – Лондон қаласында жергілікті «Бритиш Лайнхартс» командасымен финал жолдамасын сарапқа салған «арландар» 1:4 есебімен жеңіліс тапты. Рингке алғаш болып 52 кило салмақ дәрежесінде сынға түскен Азамат Исақұлов қарсыласы Корюн Согомонянға 0:3 есебімен есе жіберді. Ал 60 килода шаршы алаңға шыққан Закир Сафиуллин Люк Маккормэкке 0:3 есебімен жол берді. Сонымен қатар, 81 ки­лода бақ сынаған Нұрдәулет Жарманов дәл осы есеппен Радос­лав Панталеевтен жеңілді. Бұл күні аса ауыр салмақта (+91 кило) сынға түскен Қамшыбек Қоңқабаев та қарсыласын жеңе алмады. Ол Фрэйзер Кларкпен кездесіп, 0:2 есебімен жеңіліс тапты. Бұл кеште «Астана ар­­лан­дарының» жалғыз жеңісі Ас­лан­бек Шымбергеновке бұйыр­ды. Ол шар­шы алаңда Джошуа Кел­ли­ден 2:1 есебімен басым түсті. Алғашқы жартылай финалдық кездесулерде «Астана арландары» британиялықтардан 2:3 есебімен ұтылған болатын. Осылайша, фи­налдық бәсекеден қағылды. Ал ақтық сында «Бритиш Лайнхартс» пен кубалық «Куба Домадорес» боксшылары кездеседі. Куба­лық­тар жартылай финалда «Өз­бекс­­тан жолбарыстарын» 10:0 есе­бімен жеңген болатын. Айта кетейік, «Астана арландары» Бүкіләлемдік бокс сериясының екі дүркін чемпионы. Олар 2013 жылдың финалында «Украина атамандарын», ал 2015 жылы «Куба Домадорес» командаларын ұтқан. Аян ӘБДУӘЛИ, «Егемен Қазақстан»