Қысқы мәжіліс отырыстары басталды

Кеше Австрия Астанасы Вена қаласында Еуропадағы қауіпсіздік және ынтымақтастық жөніндегі ұйым Парламенттік Ассамблеясының қысқы мәжілісі жұмысын бастады. Оған Қазақстан Парламенті Сенатының Төрағасы, ЕҚЫҰ Парламенттік Ассамблеясының Вице-президенті Қасым-Жомарт Тоқаев бастаған еліміздің делегациясы қатысуда.

Талғат ЖҰМАҒҰЛОВ – Венадан.

Форум аясында Тұрақты ко­ми­теттің отырысы, сондай-ақ сая­си мәселелер және қауіпсіздік, эконо­ми­калық мәселелер, ғылым, технология және қоршаған орта, демократия, адам құқығы мен гума­ни­тарлық мәселелер жөнін­дегі Жалпы үш комитеттің оты­рыс­тары жүруде. Қазақстан­дық­тар Ассамблеяның саяси, қауіп­сіздік, сондай-ақ экономикалық мәселе­лер, ғылым, технология және қоршаған орта жөніндегі комитеттерге мүше болып табы­лады. Бұл – Парламенттік Ассамблея қысқы мәжілісінің оныншы кездесуі. Басқосуға 53 мемлекеттен 240 парламентші тіркелген екен және бұл осыған дейін болып келген Ассамблеяның ең ірі қысқы мә­жілісі болып табылады. Бірінші күні өткен үш Жалпы комитеттердің бірлескен отыры­сын­да Ассамблея Төрағасы Петрос Эфтимиу, Австрияның Феде­рал­дық Президенті Хайнц Фишер, ЕҚЫҰ-ның Іс басындағы төраға­сы, Литваның Сыртқы істер министрі Аудронюс Ажубалис сөз сөй­леді.  Түстен кейін болған саяси мә­селелер мен қауіпсіздік жө­нін­дегі Жалпы комитеттің мәжі­лі­сінде Қазақстан Парламенті Се­на­тының төрағасы Қасым-Жомарт То­қаев сөз сөйледі. Парламенттік Ассамблея сес­сия­сы ЕҚЫҰ аумағындағы ағым­дағы мәселелер­ді қарастырады. Талқылау тақы­рыптарының қата­рында Беларусьтегі ахуал мен Минскідегі ЕҚЫҰ Офисінің жабылуы, Қырғызстандағы жағ­дай, ЕҚЫҰ реформасы, БАҚ бос­тандығы, демократия мен адам құқықтарының сақталуы, ұзаққа созылған жанжалдар, Еуропа қауіп­сіздігінің келешегі турасын­дағы үнқатысу және басқалары бар. Әрине, форум делегаттары та­рапынан Қазақстанға деген қызығу­шылық өте жоғары. Былтырғы жылы төрағалықты үздік атқарып, Президент Нұрсұлтан Назарбаев­тың ұсынысымен он бір жылда тұңғыш рет жоғары деңгейдегі саммиті ұйымдастырып, ЕҚЫҰ-ның одан арғы бағдарын айқын­даған Астана Декларациясының қабылдануына барынша күш-жі­герін салған Қазақстан өзінің ар­тынан орасан саяси мұра қал­дыр­ды. Ал биылғы жылы Үштікке мү­ше ретінде өзінің ЕҚЫҰ-дағы белсенді саясатын жалғастыруда. Мираскерлік пен сабақтастықты қамтамасыз ететін бұл органның күнделікті жұмысымен бірге Қа­зақстан ЕҚЫҰ-ның азиялық әріп­тестерімен ынтымақтасу жө­нін­дегі байланыс тобына төрағалық етуде. Бұл топқа 56 мүше мемлекетпен қоса, ынтымақтастық жө­нін­дегі әріп­тес дәрежесіне ие алты азия­лық ел кіреді. Олар – Австралия, Ауғанстан, Моңғолия, Корея Рес­публикасы, Таиланд және Жапония. ЕҚЫҰ Астана Декларация­сын­да әріптес елдермен ынты­мақ­тастық деңгейін көтеру қажет­тілігі айтылған. Құжатта, атап айт­қанда, «аймақтық қауіпсіздік көршілес аймақтардың қауіп­сіз­дігімен тығыз байланысты, әсі­ре­се, Жерорта теңізі аймағы мен Азияда» делінген. 2011 жылы Қазақстан ЕҚЫҰ шеңберінде тағы бір жауапты әрі маңызды миссияны жүзеге асы­ра­ды. Қыркүйек пен желтоқсан ара­лығында еліміз ЕҚЫҰ-ның қауіп­сіз­дік саласындағы ынтымақ­тас­тық жөніндегі форумына төраға­лық етеді. Бұл форумның жұмысы Парламенттік Ассамблея мәжілісінің күн тәртібінде ерекше орын ал­мақ. Форум Тұрақты кеңес, Сырт­қы істер министрлерінің кеңесі және саммитпен қатар ЕҚЫҰ-ның ресми шешімдер қабылдай­тын дербес нұсқаушы органы бо­лып табы­ла­ды. Форум қатысу­шы-мемлекет­тер­дің тұрақты өкіл­де­рі­нен тұрады және ЕҚЫҰ айма­ғын­да қауіпсіз­дік пен тұрақты­лық­ты нығай­ту­дағы әскери-саяси сала­да­ғы нақты шаралар жөнінде ке­ңестер мен келіссөздер өткізу мақсатында Ұйым­ның Венадағы Штаб-пәте­рін­де апталық жина­лыс­тар ұйым­дастырады. Қару-жарақты бақы­лау, қарусыздану мен сенім шара­лары, қақты­ғыс­тардың пайда болу қаупін мейлінше азайту жөніндегі келіссөздер, қауіпсіздік мәселелері бойынша тұрақты кеңестер, сенім шарала­ры мен қауіпсіздік мәсе­ле­лерінің жүзеге асуын бағалау жөніндегі жылдық жиналыстар, әскери доктриналар жөніндегі семинарлар ұйымдастыру форум міндетіне жатады. ЕҚЫҰ-ның атқарушы құры­лым­дарында қазақстандық өкіл­дер бүгінде өз жұмыстарын одан әрі жалғастыруда. Ал биылғы қаң­тар айында ЕҚЫҰ-дағы Литва төр­ағалығы Қазақстан Парламенті Се­натының депутаты, Елші Әділ Ахметовті Іс басындағы төраға­ның Мұ­сылмандарға қатысты тө­зім­сіз­дік пен кемсітушілікке қарсы кү­рес жөніндегі Жеке өкілі ретінде қайта тағайындағанын атап өткен жөн. Жалпы, Қазақстанның Ұйым­ның үш өлшемінің жұмысына белсенді қатысуы жалғасуда. Астана ЕҚЫҰ-ға Литва төрағалы­ғымен тығыз өзара қарым-қа­ты­насқа және оның 2011 жылғы бағ­дарламасын жүзеге асыруда атса­лысуға дайын екендігін бірнеше мәрте мәлімдеген болатын. Қ.Тоқаевтың Венаға сапары­ның бағдарламасы австриялық және ха­лықаралық саясаткерлермен, са­рап­шы­лармен екіжақты кездесулерге толы. ЕҚЫҰ ПА Президенті П.Эфтимиумен, осы ұйым­ның құрметті төрағасы Жоао Соарешпен және ЕҚЫҰ ПА Бас хат­шысы Спенсер Оливермен кездесулер барысында парламент­ара­лық ынтымақтастықтың өзекті мә­се­лелері бойынша пікір алмасылды. ЕҚЫҰ/ДИАҚБ директоры Янеш Ленарчичпен кездесу бары­сын­да Қ.Тоқаев биылғы сәуір ай­ын­дағы президенттік сайлау қар­саңындағы Қазақстандағы жағ­дай туралы жан-жақты хабардар етті және Қазақстан мен ЕҚЫҰ, оның ішінде ДИАҚБ-мен ынтымақтас­ты­қ президенттік сайлау барысын­да да табысты жалғаса беретініне сенім білдірді. Өз кезегінде Я.Ленарчич ЕҚЫҰ алдағы сайлау үде­рісіне зор ықы­лас білдіретінін атап өтті. Оның айтуынша, Қа­зақстанда халықара­лық ережелер мен қағидаларға сәйкес байқау­шылар тобы жұмыс істейтін болады. Олар сайлау үдерістерін нақты әрі шынайы бағалайды, деді Я.Ленарчич. Қазақстан делегациясы бас­шы­сы­ның Австрия Республикасы­ның Федералды Президенті Хайнц Фишермен кездесуінде тараптар екіжақты ынтымақтастықтың ауқым­ды мәселелері бойынша пікір алмасты. Қ.Тоқаев былтырғы желтоқсандағы Х.Фишердің Қа­зақ­станға сапары «табысты және жемісті» болғанын атап өтті. Сенат Төрағасы Х.Фишерге Қазақ­стан Президенті Н.Назарбаевтың ізгі тілектестігін жеткізді. Одан басқа, Қ.Тоқаев Монтерей халықаралық зерттеулер инс­ти­туты қаруды таратпау мәселеле­рін зерттеу орталығының дирек­то­ры профессор Уильям Поттермен кездесті. Қазақстанның осы орталық­пен ынтымақтастығының келешегін талқылау барысында У.Поттер 2010 жылғы сәуірдегі Ва­шинг­тон­дағы Ядролық қауіпсіздік жөнін­дегі жаһандық саммитте Қазақстан Президенті Н.Назарбаев көтерген бастамаларды жоғары бағалады. Венаға сапарының алғашқы күні еліміздің делегациясы Қазақ­стан­ның елшілігі ұйымдастырған Қазақстан-Австрия дипломатия­лық қатынас­тары орнауының 19 жыл­дығына арналған қабылдауға қатысты.