Жаңа оқу жылы басталғалы бері Алматы қалалық СПИД-тің алдын алу мен күресу жөніндегі орталығы оқу мекемелерінде ВИЧ инфекциясының алдын алу үшін акциялар өткізіп жатыр.
– Зерттеулер көрсетіп отырғандай, ВИЧ дертін жұқтыруға бейім әлеуметтік топтардың ішінде бірінші кезекте жастар бар. Өкінішке орай, олар иммун тапшылығы вирусының жұғу жолдары мен одан қорғанудың амалдарын біле бермейді. Сондықтан да жастардың ВИЧ-инфекциясына шалдығуы оңай, – дейді медицина ғылымдарының кандидаты Талғат Бапиев. – Осы мәселеге орай, қалалық СПИД орталығының қызметіндегі басым бағыттың бірі – жастармен жұмыс істеу болып табылмақ. Ал алматылық студенттер арасында жүргізіліп жатқан акциялар жастарға ВИЧ және СПИД-тің жұғу жолдары, сақтану және ВИЧ-пен өмір сүріп жатқан адамдарға түсіністікпен қарау туралы толық ақпар береді.
Акция барысында арнаулы мамандар лекция оқып, тренингтер жүргізіліп, жастарға өзінің де, жақындарының да денсаулығына жүрдім-бардым қарамау насихатталады.
Ең бастысы, қажет деп тапқан студенттер құпия түрде тегін ВИЧ-ке тексеріліп, медицина қызметкерлері тарапынан кеңес ала алады. Бұл үшін оқу мекемелеріне қажетті құрал-жабдықтар орнатылған арнаулы мобильді лаборатория келіп, бірнеше минуттың ішінде экспресс-тестілеудің көмегімен қанда вирус бар-жоғын анықтап бере алады.
Алматы қаласындағы СПИД орталығының жылжымалы лабораториясы ҚМЭБИ, С.Асфендияров атындағы ұлттық медициналық, Қазақ мемлекеттік қыздар педагогикалық университеттері, Аграрлық колледж сияқты оқу орындарына барады.
Осы арада 2011 жылдың алғашқы жарты жылдығында, яғни 1 шілдеге дейін республикамызда өсіңкі қорытындымен 16741 ВИЧ-позитивті адам анықталғанын айта кетсек дейміз. Бұл – 100 мың адамға 101,8 адамнан келеді деген сөз.
Айнаш ЕСАЛИ.
Алматы.