Мұхит үстіндегі сеңді еріту оңай шаруа болмағанымен, адам көкірегінде жатқан арман – сеңді жібіту әлдеқайда қиын екеніне ғасырлар бойғы тарихымыз куә. Адам санасындағы сеңді бұзып шығып, келешекке жол ашу асқан қайратпен тәуекелшілдікті бойына дарытқан, еліне сенімі мол, Қазақ елінің алтын діңгегі бола білген, халқын қадірлеп, Отанын ардақтаған Н.Ә.Назарбаевтың ғана қолынан келді.
Өткен ғасырдың 90-жылдарының басындағы Одақ тарағаннан кейінгі ел жағдайын бір сәт еске алайықшы. Сол кездегі сірескен қиындықтарды көре тұрып, жауапкершілікті «арқалап», 17 миллионнан астам халқына пана болуына, бел шешіп кіріскен азамат – Нұрсұлтан Әбішұлы Назарбаев болды. «Ел бастау қиын емес, қонатын жерден көл табылады. Қол бастау қиын емес, шабатын жерден ел табылады. Шаршы топта сөз бастаудан қиынды көрген жоқпын», – деген екен Бұқар жырау бабамыз. Елбасының қыл көпірдің талайынан таймай өткеніне куәгерміз. Ұшы-қиыры жоқ кедергілерді жеңу үшін әр өңірдің, әр шаруаның айырмашылығын ескере отырып қиындықтарды жасырмай, оларды түзету жолдарына халықтың көзін жеткізіп ынтасын арттырып отырды.
Мұнымен қатар, тәуелсіздікті баянды ету үшін, мемлекеттік шекараны анықтап бекіту, дипломатиялық корпусты қалыптастыру, тоқтап қалған өндірістерді іске қосу, халықтың әлеуметтік әлеуетін жақсарту, заңдылықты сақтау, халықтың өз еліне деген сенімділігін аттыру, мектептердің, басқа оқу орындарының үздіксіз жұмыс істеуі, жастарға жаңа талапқа сай жағдайлар жасау, шетелдерде оқыту, патриоттық рухын көтеру, шет мемлекеттерден инвестиция тарту сияқты және т.б. мәселелердің байыпты болуын қамтамасыз ету керек болды. Бұлар айтуға ғана оңай еді.
Н.Ә.Назарбаевпен бірінші рет жүзбе-жүз кездесуіміз 1976 жылы Әзербайжан Республикасының астанасы Бакуде өткен Бүкілодақтық Азия және Африка елдерімен ынтымақтастық комитетінің есеп беру, сайлау сессиясында болды. Сессияға делегаттар: Н.Назарбаев, Е.Серкебаев, Е.Лизунова, Ш.Мұртаза, Ө.Жәнібековпен бірге қатыстық. Азия және Африка елдерінен келген қонақтар болды. Олар өз елдеріндегі отарлық қыспақтарды жеңіп, жеке мемлекет болып қалыптасудың, әлеуметтік қиындықтарды шешу жағдайларының қиындықтарын айтып, біздің елге рахметтерін жеткізді. Арамызда шетелдермен кездесу жиналысына бірінші болып қатысқан партия қызметкері, талапты да талантты жас Нұрекеңнің алды ашық болатынына зор сеніммен тілектер айтыстық. Нұрсұлтан Әбішұлы Назарбаевтың Қазақстан Орталық партия комитетінің өндіріс жөніндегі хатшысы болып сайланғанымен құттықтап, жақында жарық көрген өзімнің кітапшамды ұсындым.
2003 жылы Астанада әйелдер мерекесі – 8 наурыз қарсаңында Н.Ә.Назарбаев қатысқан үлкен республикалық жиналыс өтті. Оған Парламент мүшелері, министрлер қатысты. Бұрынғы астана – Алматыдан бір топ делегат келгенбіз. Келешегі зор жас қала Астананы құттықтап, жүзі көркем, айбыны биік, еліміздің өсіп-өркендеуіне бас болсын деген жақсылық тілектер айтқан едім. 2005 жылы Астанада Президент сайлауы қарсаңында өңірлік ардагерлер Кеңестерінің жетекшілері бас қосқан кездесуде Нұрсұлтан Әбішұлының халыққа арнаған ойларын тыңдадық. Осы сапар барысында Еліміздің ардақты ақсақалдары – Бәйкен Әшімов бастаған ел ағалары Нұрекеңе сайлау алдында батасын берді.
Ұлы Жеңістің 65 жылдығын Астанада қарсы алдық. Алматы қаласынан 20 шақты Отан соғысының ардагерлері, ішінде отағасы Шапағат Әлбазарұлының (Берлинді алу операциясына қатысқан) салтанатты мәжілісте бірінші аты аталып, Нұрекеңнің қолынан «Құрмет» орденін алды.
Тәуелсіздіктің әр жылына куәгер болып, оған ат салысу 1992 жылдан басталған екен. Алматы қалалық ардагерлерінің Жастар коммиссиясын басқарамын. Отан соғысына қатысқан, соғыс жылдары тылда еңбек еткен беделді азаматтармен бірге мектептерде, орта және жоғары оқу орындарында жастармен мәнді кездесулер, дөңгелек үстел, конференциялар өткіземіз. Зиялы қауым өкілдері өздері жүріп өткен өмірлері туралы айтып, жастарға білімді маман болуды, үш тілді меңгеруді, күнделікті өмірге икемделуді, халықтар арасындағы татулықты сақтау, Қазақстандық патриоттық сезімді нақты істермен көрсетуді насихаттайды. Ардагерлердің қоғамдық жұмыстарға қатысқан еңбектері еш кеткен жоқ. Бір жарым миллиондай халқы бар, 130-дай ұлт өкілдері шоғырланған, әсем қала Алматыда, сондай-ақ бүкіл елімізде тыныштық пен татулық салтанат құрды.
Мен тауды бұзып, тас жарған адам емеспін. Отан соғысы жылдары жер жыртып, егіс егіп, оны жинап мемлекетке өткізу мәселесінде көмекшілер қатарында болғаным бар. Атқарып келе жатқан еңбегім – жастарымыздың адал болуына, білімді болуына, ұлттық әдет-ғұрып пен, патриоттық рухта тәрбиеленуіне шама келгенше көмектесіп, жасым 90-ға жақындап отырса да ел бірлігіне үлес қосып отырғаныма тәубе деймін.
Жер жүзі мемлекеттеріне үлгі көрсеткен, адам көкірегіндегі сеңді бұзып, қазақ елін Мәңгілік жолға бастаушы Тұңғыш Президентіміз – Елбасы Нұрсұлтан Әбішұлы Назарбаевқа Алла жар болсын! Мереке құтты болсын, елімізге таусылмас табыс, зор абырой тілеймін!
Бижамал РАМАЗАНОВА,
Алматы қаласының құрметті
азаматы, қалалық ардагерлер
кеңесінің мүшесі