Қазақстан-Қытай: Әріптестік әлеуеті жоғары

Өткен жексенбі күні Қазақстан Парламенті Мәжілісінің Төрағасы Орал Мұхамеджанов Қытай Халық Республикасы Халық өкілдері бүкілқытайлық жиналысы Тұрақты комитетінің Төрағасы У Бангомен кездесіп, келіссөз жүргізді. О.Мұхамеджанов  өзінің сө­зін­де Парламент Мәжілісі Қазақ­стан мен Қытай арасындағы стратегиялық әріптестікке ерекше көңіл бөлетінін және оның дамуына үлес қосатынын айта келе, қос мемлекет арасындағы ынтымақтастық байланыс екі ел мен екі ел халықтарының талап­тарына толық жауап беретінін жеткізді. Қазақстан мен Қытай арасындағы көршілес елдердің тұрақты достық қарым-қатынасы – халықаралық және аймақтық қауіпсіздікті қамтамасыз етудің маңызды тетігі, деді Парламент Мәжілісінің Төрағасы. О.Мұхамеджанов сондай-ақ соңғы жылдары қос мемлекет ара­сында жоғары деңгейде жүр­гізілген кездесулер мен келіс­сөз­дер ынтымақтастықтың өркендей түсуіне жол ашқанын атап көр­сет­ті және мәртебелі мейманды Қытай Халық Республикасының құрылғанына 62 жыл толуымен құттықтады. У Бангоның ресми сапармен ел Тәуелсіздігінің 20 жылдығы қар­саңында келіп отырғанын айта келіп, осы кезең ішінде мем­ле­ке­тіміздің Тұңғыш Президенті Нұр­сұлтан Назарбаев жүргізген сарабдал саясат арқасында Қа­зақ­стан халықаралық деңгейде бейбітшілік пен қауіпсіздікті, ұлтара­лық және дінаралық үнқатысуды ны­ғай­туға, ядросыз әлем орнату ісіне айтар­лықтай үлес қосқанын көлденең тартты. Бұл күнгі екіжақты кездесу шеңбе­рін­де Қазақстанның 2010 жылы ТМД елдерінің арасынан бірінші болып ЕҚЫҰ-ға төрағалық еткендігі, соның нәтижесінде аталған ұйымның қызме­ті­не жаңа серпіліс берілгендігі, соңғы 11 жылдан бері өтпей келген ЕҚЫҰ Саммитін Астана қаласында шақыруға мүм­кіндік туғандығы, қабылданған Астана декларациясының ЕҚЫҰ-ның беделін көтере түсуге негіз қалағаны атап көрсетілді. Биыл Қазақстан Ислам Ынты­мақ­тас­тығы Ұйымына жетекшілік ету жөніндегі маңызды міндетті өз жауапкершілігіне алғандығы белгілі. Осы тұрғыда халықаралық және аймақтық қауіпсіздікті нығайту, Ислам әлемі мен Батыс арасындағы үнқатысуды жақын­дастыру бағытында қандай мәселелерге көңіл бөлініп отырғандығы да назардан тыс қалмады. Мәжіліс Төрағасы бұл ретте еліміздің экономикалық және мәдени-гуманитарлық салалардағы жетістіктерін мысалға келтірді. Қос мемлекеттің қарым-қатынасын арттыруда парламентаралық  байланыс­тың рөлі де зор екені анық. 2007 жыл­дан бері Қазақстан Парламентінің Мә­жі­лісінде  24 депутаттан тұратын Ха­лық өкілдері бүкілқытайлық жиналы­сы­мен ынтымақтастық тобы жұмыс істейді. Ал өткен жылғы қараша айында Қытай Халықтық саяси консультативтік кеңесі Бүкілқытайлық комитетінің Төр­ағасы Цзя Цинлинь елімізге келген бо­ла­тын. Қазақстан Парламенті қытайлық әріптестерімен экономикалық өрлеу және әлеуметтік тұрақтылықты сақтау­дың заңнамалық қамтамасыз етілуі тұр­ғысында тығыз байланыс орнатып келеді. Мәжіліс Төрағасы, атап айтқанда, Бі­рік­кен Ұлттар Ұйымы, Шанхай ын­ты­мақтастық ұйымы, Азиядағы өзара іс-қимыл және сенім шаралары жө­нін­де­гі кеңес секілді бірқатар халық­ара­лық ұйымдар мен форумдар шеңберін­де Қазақстан мен Қытайдың өзара қарым-қатынасы жоғары деңгейде екенін жеткізді. Алдағы уақытта да екі елдің халықаралық істерде бір-біріне стратегиялық әріптестік қолдау көрсе­тіп отыратынына сенім білдірді.  Сө­зі­нің соңында О.Мұхамеджанов екі елдің арасындағы байланыс алдағы уақытта тереңдей түсетіндігіне үміт артты. У Банго ең алдымен жылы қабыл­дап, еліне ықылас танытқандары  үшін қонақжай қазақ еліне алғыс білдірді. Көп жылдан бері Қазақстан Қытаймен арадағы ынтымақтастықтың дамуына айрықша назар аударып келгені анық. Және осы жылдар бедерінде қазақ жұр­ты қос елдің сан салалы байла­ныс­ы­ның өрістеуіне айтарлықтай үлес қос­ты. Мұндай әріптестік болашақта да дами түседі деген ойдамыз. Қытай сіз­дер­дің қос тарап арасындағы байланыстың дамуы бағытында атқарып жатқан жұ­мыстарыңызды жоғары бағалайды. Бұл – Қазақстанға жасаған алғашқы сапа­рым. Мен Алматы қаласында болып, енді міне, Астана қаласына келдім. Аз ғана уақыт болған күннің өзінде сіз­дердің елдеріңіз, әсіресе, Астана маған үлкен әсер қалдырды, деді У Банго. Бұдан кейін ол Қазақстан мен Қы­тай арасындағы қалыптасқан байла­ныс­ты дамытудың жолдары, соның ішін­де, парламентаралық ынтымақтас­тық, халықаралық парламентаралық ұй­ымдарда өзара ықпалдастықты ны­ғай­та түсу жөніндегі өз ойларымен бөлісті. Бүгінде Президент Н. Назар­баев­тың жетекшілігімен Қазақстандағы қоғамдық-саяси тұрақтылық берік қа­лып­тасып келеді. Ел ішінде жоғары экономикалық өрлеу бар. Қазақстанның ұстанымы нығайып, әлемдік беделі өсуде. Әлеуметтік-экономикалық көр­сет­кіш ретінде сіздердің елдеріңіз Ор­та­лық Азияда жетекші елге айналды. Сол себепті біз өз тарапымыздан сіздерді жеткен жетістіктеріңізбен құт­тық­таймыз. Болашақта бұл жетіс­тік­те­ріңіз еселене түседі деген сенімдеміз,  деді  Тұрақты комитет Төрағасы. Сөзі­нің соңында У Банго Мәжіліс Төрағасы Орал Мұхамеджановты ресми парламенттік сапармен Қытайға келіп кетуге шақырды. Кездесуден кейін Мәжіліс Төраға­сы­ның шақыруымен У Банго Мәжілістің құрметті қонақтар кітабына тілегін жазып,  қолтаңбасын қалдырды. Ләйла ЕДІЛҚЫЗЫ.