Спорт – ел намысы

Бүгінде Қазақстан былғары қолғап шеберлерінің әлемдік деңгейдегі барлық жарыстардан жүлдемен оралып жүргенін білеміз. Бұл ретте бокстың тек жоғары шеберлік деңгейін ғана өсіріп қоймай, бүкіл ел бойынша дамуына жан-жақты жағдай жасап отырған Қазақстан Бокс федерациясына алғыс айту орынды деп санаймыз. Біз жаңа жыл қарсаңында Қазақстанның мемлекеттік жат­тық­тырушысы, АИБА-ның техникалық делегаты Болат АБДРАХМАНОВПЕН әңгімені оқырман назарына ұсынып отырмыз. – Болат Үкібайұлы, қай салада болса да жыл соңында бір есеп жасайтын сәт бо­ла­ды. Осы орайда Қазақстан боксының жалпы жағдайына тоқталып өтсеңіз. – Қазіргі кезде, өздеріңіз де білетін шығарсыздар, бүкіл әлем бойынша бокс өте дамып барады. Мәселен, осыдан 5-6 жыл бұрын Қытай, Моңғолия, Ир­ландия, Әзербайжан, Үнді­с­тан сияқты елдерде боксқа соншалықты мән берілмейтін еді. Ал бүгін ше?! Жағдай, көз­қарас мүлдем өзгерген. Демек, көптеген елдерде бокс көпшілік спортқа айналып отыр. Қазақстан Бокс федерациясы да осы жағдайды ескеріп, бүкіл республика бойынша боксты да­мытудың жаңа жобаларын іске асыра бастады. Боксты ал­дымен ел өңірлерінде дұрыстап дамыту қолға алынды. Бұл істі жергілікті мекемелер мен кәсіп­керлер қауымы қолдай түсті. Соның нәтижесінде еліміздің көптеген қалаларында, кейбір аудандарында арнайы бокс мектептері мен кешендері іске қосылды. Тағы бір айтарым, әр іс нә­тижесіне қарап бағаланады. Бұл орайда екі жылдан бері өткі­зі­ліп келе жатқан Қазақстан Бокс федерациясының кубогі үшін жарыс ел спортындағы ұтымды жобалардың бірі болды деп айтуға болады. Федерация ку­бо­гі өңірлердегі бокстың қан­ша­лықты дамып отырғанын аң­ғартады. Мәселен, былтыр Астана құрамасы жеңімпаз атанса, биыл Қарағанды облысының құ­рамасы жеңіске жетті. Биыл өткен жылы жартылай финалға шыққан командалардың бірі де оған жете алмады. Бұл дегеніміз, нағыз бәсекені көрсетеді емес пе?! Бокс осылайша іштен жан­данып, іштен жетілгені өте дұрыс деп ойлаймын. Сонда негізгі құ­рамаларға нағыз мықтыларды іріктеу-таңдауға жол ашылады. – Халықаралық жарыстарда ел намысын қорғап жүрген боксшыларымыздың көрсет­кіш­терін қалай бағалайсыз? – Жасыратыны жоқ, елдік тұр­ғы­дан қарағанда, ірі ресми жа­рыс­тардың көрсеткішін алға тар­та­мыз. Менің ойымша, өткен жыл мен биылғы жылдың соңын алып қарасақ, екі боксшымыз Азия ойындарында чемпион атанды, биыл Астанада өткен жасөспі­рім­дер арасындағы әлем біріншілігінде де чемпион шықты. Азия чемпионатынан да екі алтын әкел­дік, тек бір өкініштісі – Бакуде өткен әлем чемпионатында ал­тын жүлдеге жетпей қалдық. – Жақындап қалған жаңа жыл спорт әлемі үшін ерекше бол­мақ. Жазда Лондон алаң­дарында Олимпия ойындары өткелі тұр, осы орайда жан­кү­йерлер Қазақстан боксшы­лары­на әдеттегідей үлкен үміт артатыны белгілі... –  Ойыңызды түсіндім. Олимпия ойындары, бұл – спорттың ең биік шыңы. Олимпиада чем­пио­ны – мәңгілік атақ. Тек қана спортшының атағы емес, мем­ле­кеттің мерейі, ұлттың абыройы. Сондықтан да Қазақстан Бокс федерациясы үшін Лондон ойын­дарында биік көрсеткішке қол жеткізу – ағымдағы ең басты мақ­сат. Осы орайда ҚБФ президенті Тимур Құлыбаев барлық ма­ман­дарға жоғары талап қойып отыр. Біз қалай да Қазақстанның көк туын биікте желбіретіп, қа­сиетті Әнұранымызды әуелетуіміз керек. Ал боксшылар туралы айтсам, әзірге көздеген межеміз түгел сияқты. Әлем чемпионатынан 5 ли­цензия алынды, Қанат Әбу­тәліпов АИБА-ның WSB тұжы­ры­мы бойынша өткен чемпио­нат­тың жеңімпазы ретінде тағы бір жолдамаға ие болған. Енді үш салмақ бойынша лицензия үшін айқасатын жігіттеріміз бар. Бұл жарыс алдағы жылдың наурыз айында Астанада өтетін болады. – АИБА туралы айтып қал­дыңыз, осы әлемдік бокстың басқарушы органымен қарым-қатынастарыңыз қалай? – Өте жақсы. Қазақстан Бокс федерациясының президенті Ти­мур Құлыбаев АИБА-мен ара­да­ғы қатынасқа ерекше маңыз беріп отыр. Соның арқасында өз елімізде ірі халықаралық жарыстар өт­кізуге мүмкіндік алуда. Биыл жасөспірімдер арасындағы әлем чемпионаты, әйелдер боксынан Азия чемпионаты өтті. 2013 жылғы ересектер арасындағы әлем чемпионаты Астанада өте­тін болды. Бұл үлкен жетістік деп ойлаймын. Сонымен қатар, Тимур Асқарұлы АИБА бас­шы­ларымен бірлесіп, елімізде халықаралық деңгейдегі бокс академиясын салуды да ойлас­тырып қойды. Осындай белсенділік пен беделдің арқасында Қазақстанның бірнеше өкілі АИБА-ның құрылымына мүше болды. Мәселен, мен өзім бірінші болып осы ұйымның техни­калық делегаты болып сайлан­ған едім. С.Қонақбаев пен Б.Мыр­жықбаев техникалық, Ю.Цхай жаттықтырушылық, И.Сатов ме­­дициналық, А.Сатқалиев әйел­дер боксы, М.Ни және А.Игубаев ІТО комиссияларына мүше бо­лып қабылданды. Бұл да Қа­зақ­стан Бокс федерациясына көр­сетіліп отырған сенімді білдіреді. – Ұлттық құраманың бас­ты мақсатын білдік, ал жастар мен жасөспірімдер, яғни Қазақстан боксының резервіне көңіл бөлу жағы қалай? –  Бұл жерде, біріншіден, мы­на жағдайды айтып өтсем. Қазір еліміз бойынша ұйым­дас­тырылатын барлық жарыс­тар халықаралық талаптарға сай өт­кізіледі. Екіншіден, спорт­шы­ларға медициналық қызмет көр­сетуге ерекше талап қойылған. Жастар мен жасөспірімдер ко­мандаларын да түрлі жарыс­тарға қатыстыру жүйесі қалып­тасты. Бапкерлер мен төреші­лердің шеберлігін жетілдіру де назарда ұсталады. Осының бәрі Қазақстан Бокс федерация­сы­ның резервті алдын ала тәр­бие­леуге бағыттап жасап жатқан жұмыстары. Мұндай мақсатты жұмыстардың нәтижесі бола­тыны сөзсіз.

 Әңгімелескен Дастан КЕНЖАЛИН.