Кеше Орталық сайлау комиссиясында Б.Имашевтың төрағалығымен Шымкент қаласынан Парламент Сенатының депутаттарын сайлау қорытындыларын жариялау және бекіту туралы, сондай-ақ шығып қалған кандидаттардың орнына кандидаттыққа ұсынылу және тіркеу нәтижелері туралы отырыс өтті.
Қазақстан Республикасы Президентінің 2018 жылғы 9 тамыздағы № 731 Жарлығына сәйкес, 2018 жылдың 5 қазанында Шымкент қаласында Қазақстан Парламенті Сенатының депутаттарын сайлау өткені белгілі.
Орталық сайлау комиссиясының мәліметінше, сайлауға барлығы 6 үміткер қатысты, оның ішінде 2 адамды қала мәслихаты ұсынса, 4 адам өзін-өзі ұсыну тәртібімен сайлауға түсті. Сайлау қорытындысы бойынша 2014 жылғы 1 қазанда сайланған Парламент Сенаты депутаттарының өкілеттік мерзіміне Дархан Амангелдіұлы Сатыбалды, 2017 жылғы 28 маусымда сайланған Парламент Сенаты депутаттарының өкілеттік мерзіміне Нұрлан Құдиярұлы Бекназаров сайланды.
Сонымен қатар Қазақстан Республикасының Конституциялық заңының 101-бабы «Қазақстан Республикасындағы сайлау туралы» Заңына сәйкес ағымдағы жылдың 28 қазанында 83 округ бойынша шығып қалған мәслихат депутаттарының орнына сайлау өтеді. 12 облыстық, 9 қалалық, 62 аудандық мәслихат депутаты сайланады.
ОСК хабарлауынша, мәслихат сайлауына барлығы 284 кандидат ұсынылып, 249 кандидат тіркелген. Тіркелген кандидаттардың 177-і (71,1%) ерлер, 72-і (28,9%) әйелдер. Үміткерлер арасында барлығы 8 ұлт өкілдері бар. Кандидаттардың орташа жасы – 41,8 жас. 219 үміткердің (88%) жоғары білімі, 24-нің (9,6%) арнаулы орта және 6-уының (2,4%) орта білімі бар. 13-і (5,2%) – мемлекеттік қызметші, 97-сі (39%) – мемлекеттік кәсіпорындардың қызметкерлері, 127-сі (51%) – коммерциялық құрылымдардың қызметкерлері, 10 адам (4%) саяси партиялардың және ҮЕҰ қызметкері, 1 адам (0,4 %) уақытша жұмыс істемейді, 1 үміткер (0,4%) – зейнеткер.
Тіркеу мерзімі аяқталғаннан кейін кандидаттардың барлығы қазанның 26 күнінің соңына дейін жалғасатын сайлауалды үгіт-насихатқа кірісті. Сайлау күні алдындағы және дауыс беру күні сайлау алдындағы үгіт-насихат жүргізуге тыйым салынады. Сайлау кампаниясы сайлау заңнамасы нормаларының талаптарына сәйкес өтуі тиіс, деп хабарлады Орталық сайлау комиссиясының баспасөз қызметі.