Әрине, бүкіл ел сенім артып сайлаған Президенттің іске білек сыбана кірісері сөзсіз. Бұл өз еліміздегі ахуал болса, шетелдердің де заңды мерзіміне халық сайлаған Президентпен жұмыс істегісі келер. Қазақстан Республикасының Тұңғыш Президенті – Елбасы Нұрсұлтан Назарбаев ел дамуын жаңа арнаға бастауды, жаңа бір серпін туғызуды көздеп өз қалауымен отставкаға кетсе, Қасым-Жомарт Тоқаев та бұл сенімге қылау түсірмеуді көздегендей. Демек, уақыт оздырмай, «темірді қызған кезінде соқ» дегендей, президенттік сайлауды шұғыл өткізген әбден дұрыс.
Халық айтса, қалт айтпайды. Бұл – бұлтартпайтын анық сөз, анық тұжырым. Ал халық Елбасы тапсырмасымен елімізде қолға алынған көптеген бағдарламаның жүзеге асуын, тоқырамауын қалайды. Жаңа сайланған Президент сол бағдарламаларды аяқсыз қалдырмай, жүзеге асырады, одан әрі де жандандыра түседі деп сенеді.
Осы күндері эфирге шығып, баспасөз бетіне жазып, пікір айтушылар өте көп, белсенді. Арасында батагөй ақсақал қариялар да, кәсібін дөңгелеткен кәсіпкерлер де, жалындаған жастар да жеткілікті. Әсіресе, көздері ашық, көкіректері ояу студенттердің пікірлері өте сауатты, терең. Құлақ түріп, тыңдасаң, қуанасың. Жастар білімді, сауатты, ел болашағы үшін жан-тәнімен алаңдаулы болса, ол болашағымыздың жарқындығының кепілі емес пе? Бұл – алдағы президенттік сайлауға халықтың белсене қатысатындығының оң нышаны.
Әріптестерімізбен, оқырмандарымызбен бұл тақырыпқа әр күн сайын пікірлесіп отырамыз. Сонда туындайтын ортақ пікірге тоқталар болсақ, ең бастысы – елдің тыныштығы, бейбіт өмір. Тұңғыш Президенттің «Рухани жаңғыру», «Ұлы даланың жеті қыры» бағдарламалық мақалалары бойынша өңірде жүріп жатқан жұмыстар, ол шаралардың тиімді тәрбиелік-танымдық нәтижесіне де жұрт қуанышты. Бурабайда «Ботай-Бурабай» мұражай кешені ашылған, Абылай хандық құрып, Кенесары қол бастаған, Шоқан ойға шомып, Біржан сал, Ақан сері, Үкілі Ыбырай, Балуан Шолақ пен Иманжүсіп ән салған бұл өлкеде әлі атқарылар шаруа ұлан-ғайыр.
...Күні кеше ғана Ақмола Қазақстан халқы Ассамблеясы жанындағы облыстық қоғамдық кеңесінің кеңейтілген мәжілісіне қатыстым. Онда облыстық ардагерлер кеңесінің төрағасы Ғосман Төлеғұл, «Вайнах» облыстық чешен-ингуш қоғамының төрағасы Герихан Яндиев, «Чуваш этномәдени бірлестігінің» төрайымы Елена Мащинская, Ақан сері атындағы мәдениет колледжінің директоры Құралай Ыдырысова, Зеренді аудандық Аналар кеңесінің төрайымы Күләш Рахымжанова, тағы басқалар кезектен тыс президенттік сайлауды толық қолдайтындықтарын бірауыздан жеткізді. Олардың бәрі де өз еңбек ұжымдары, қауымдастықтары мүшелерінің сайлауға белсене қатысатындықтарын жеткізді. Бәрі де осыған дейінгі шағын және орта бизнесті қолдау, көп балалы аналарға қамқорлықты жетілдіру, мұғалімдер мен медицина қызметкерлері, аудан-ауылдағы мемлекеттік қызметкерлер еңбекақысын көтеру шараларының біртіндеп орындала беруін қалайтындықтарын айтты.
Елбасы Н.Назарбаев Қазақстанның бейбіт жолмен дамудың сара жолына түскен, сол бағыттан айнымайтын, кімнің болса да сенім арта алатын берекелі ел екенін дәлелдеді. Бейбіт өмірді, берекелі тірлікті, достық пен татулықты ту еткен елмен тізе қоса жұмыс істеп, табысқа қол жеткізуге құштар мемлекеттер саны арта түсері де сөзсіз. Халық ел алдына қойылған ірі бағдарламаларды жүзеге асырар Президентін сайлауға дайын. Ал сайлаудың Президент үндеуінде айтылғандай, заңға сәйкес әділ өтетінінен үміт мол.
Серік ЖЕТПІСҚАЛИЕВ,
жазушы, «Көкшетау» газетінің бас редакторы
Ақмола облысы