Huawei-ге қара бұлт төнді ме?

Трамптың тиісті жарлығы шыққаннан кейін іле-шала бүкіләлемдік Google корпорациясы Huawei-мен байланысын үзгені белгілі. Артынша Intel, Qualcomm, Xilinx, Broadcom­­ сияқты микроэлектро­ника са­­ласындағы алпауыттар да қы­тайлық әріптесімен жұ­мысын тоқтатты. Google-дің бағдар­ламалық қолдауынан айы­ры­лғаны, Android-тың жаңғырту жүйелерінен қол үзіп қалғаны әлемдік телекоммуникация на­рығындағы алпауытқа қалай әсер етпек? Басына қара бұлт үйі­рілді дей беруге бола ма?

IT-блогер Ерлан Оспанның айтуынша, Трамптың «қара тізіміне» енген компаниямен жұмыс істеу кез келген компания үшін қауіпті. Сондықтан Американың санкциясына ұшырамау үшін бизнес әлемі әлдеқашан екі қадам алда жүруге әдеттенген. Демек, Huawei-дің смартфондарынан бастап, ноут­бук пен желі жабдықтары өндірісі бизнесіне кәдімгідей қатер төнді дей беруге болады. 

– Айталық, бұрын Huawei ноутбуктарына процессорды Intel-ден алатын. Ал оның смартфондарына Qualcomm процессор беретін еді. Енді екеуі де көмектеспейді, оған мүмкіндік жоқ. Бірақ соған қарамастан қытайлық hi-tech алпауыты берілмеуге тырысуда. Қалай болған күнде де Huawei-дің 2020 жылға қарай «әлемнің үздігі боламыз» деген ұранының орындалуы екіталай. Себебі HiSilicon-ның, жалпы Қытайдың ғылыми-технологиялық әлеуетін жаһан­дық жетістіктерден бөліп қарау қиын, – дейді ол. 

Ерлан Оспан айтқандай, бұл жерде қарабайыр қисынға салсақ, Қытай микрондық технология мен топология саласында Батыстан озса – сырттан сатып алуды әлдеқашан тоқтатар еді. Сондықтан, Қытай тарапының мәлімдемелеріне қарамастан Huawei-ге технологиялық тұр­ғы­­дан артта қалу қаупі төніп тұр. Мысалы, ақпараттық тех­ноло­гиялар мен телекоммуникация саласындағы тағы бір ал­пауыт – кореялық Samsung қарап жатпайды, осы оқиғаны пайдаланып қалуға тырысады. Google-дің Huawei техникаларын қолдауды тоқтатуы туралы хабар гаджетсүйер жұртты біраз дүрліктіргені бекер емес деуге болады. 

– Ал Android жүйесінен айы­рылудың зардабы өз алдына бөлек әңгіме. Меніңше, Huawei-дің SOS жүйесін өзіміз жасап алдық, сынақтан өткізіп жатырмыз деген мәлімдемелері шындықтан гөрі, «арығын біл­дірмей, сыртқа жүнін қам­пайтуға» көбірек ұқсайды. Иә, тіпті жүйені жасап алуға да болады. Бірақ оған қосымша жа­затын миллиондаған бағдар­ламашыларды тез арада тәрбие­леп ала қою мүмкін бе? Менің­ше, мүмкін емес. Android – кодер­лер үшін «ауруы» әбден бел­гілі болған «атыспаққа жақ­сы ескі жау». Екіншіден, ешкім Америка нарығында сатылмауы мүмкін қосымша жасауды үйрене қоймайтын шығар, – дейді IT-блогер. 

Сонымен Huawei смартфонын сатып алатын аға­йын үшін енді Android-тың жаң­ғыртулары жабық. Googl Play дүкені мен Gmail электронды поштасын да қолдана алмайды. 

Blumberg-тің хабарлауынша, қытайлық компания қанша жерден қуатты болса да, америкалық компанияларға тәуелді. Қазірдің өзінде үш-ақ айға жететін қо­сым­ша бөлшектері қалған Huawei­ одан кейін шығынға ба­­туы­ әбден мүмкін. Соған қа­ра­­­мас­тан, компания басшысы еш­­­­қандай күрделі мәселе жоқ еке­­нін айтудан танар емес. АҚШ үкіметінің шешімінен кейін іле-­шала баспасөз мәслихатын өт­кіз­ген компания басшысы:

– Сөз жоқ, біз клиенттерімізге лайықты қызмет көрсетуді жал­ғас­тыра береміз. Біздің сериялық өндірісте орасан зор күш-қуа­тымыз бар, дүниежүзілік нарық­та бәсекеге қабілетті болып қа­ла береміз. Өсім қарқыны тө­мен­деуі мүмкін, бірақ бұл сон­ша­лықты жоғары болмайды. Биыл бірінші тоқсандағы біздің опе­рациялық табыстарымыз был­тырғымен салыстырғанда 30 пайызға жоғарылады, сәуір айында 25 пайызға төмендеді. Бәлкім, жыл соңына дейін бұл көрсеткіш тағы да төмендейтін шығар, бірақ минусқа кірмейміз, – деді ол. 

Huawei ақпараттық техноло­гиялар мен телекоммуникация саласындағы аса ірі компания­лардың бірі саналады. Әлемнің 170 елінде жұмыс істейтін, 180 мыңнан астам адам қызмет ететін компанияның былтырғы табысы 108,5 миллиард АҚШ долларынан асып түсті. Бүгінгі таңда жер шарындағы халықтың үштен бір бөлігіне жуығы осы компанияның өнімдерін тұты­нады деген дерек бар. Қытайлық компанияның Қазақстандағы еншілесі «Хуавей Текнолоджиз Қазақстан» компаниясы 2007 жылы ашылған болатын.