Бижамал Рамазанова өмірдің бұралаңы, бұрылысы көп жолдан абыроймен өткен, өмірде қиналса да сыр бермеген, майысса да сынбаған, тұғыры биік тұлға. Өмірде көпті көрген, көп жайларды ойына түйген оның ақ жүрекпен ақтарыла айтар әңгімесі аз емес. Дара туған даналардың бірі Бижамал анамыздың сондай сымбаты бөлек сұлу сырларының бір парасы оның «Дайк Пресс» баспасынан көрген, «Тарихи кездесулер» атты көлемімен ғана емес, көркемділігімен де көрікті кітабында тоғысыпты.
Кітаптың құрылысы да тапқыр түзілген. Бұл айтары анық, бояуы қанық деректі, керекті кітап: «КСРО басшылығы және танымал тұлғалар», «Қазақстанның көрнекті қайраткерлері», «Қазақстан қаһармандары», «Жазушылар», «Көрнекті қайраткерлер» және «Ғалымдар. Әріптестер. Достар» атты алты бөлімнен тұрады. Кітаптың мәтінін баяндап, көзіқарақты оқушының уақытын алмай-ақ қоялық, себебі әр бөлімнің аттары әңгіменің кім, не жайлы екенін туарай, шығар күндей айқын, анық айтып тұр. Әсіресе, өзі жүздескен Никита Хрущев, Леонид Брежнев, Вячеслав Молотов, Юмжагийн Цэденбал, Дінмұхаммед Қонаев, Нұрсұлтан Назарбаев, Ілияс Омаров сынды мемлекет қайраткерлері, Бауыржан Момышұлы, Рақымжан Қошқарбаев, Сағадат Нұрмағамбетов тәрізді қаһармандар; Мұхтар Әуезов, Сәбит Мұқанов, Ғабит Мүсірепов, Мирзо Тұрсынзаде қатарлы әдебиет алыптары; Патшайым Тәжібаева, Зылиқа Тамшыбаева, Күләш Құнантаева, т.б. достары жайлы жазбалары, жоғарыда аттары аталған тарихи тұлғалардың іс-әрекеттері, кейбірінің осал тұстары, Хрущевтің күлкілі әрекеттері, барша кейіпкерлердің мінездері мінсіз мүсінделген.
Кітап авторы Бижамал Рамазанова 12 жыл Қазақ КСР Жоғары Кеңесі Президиумының хатшысы болып үлкен мемлекеттік қызмет істеген, Қазақстанның Азия және Афира елдерімен Ынтымақтастық комитетінің төрағасы болған, ұзақ жылдар бойы Алматы қалалық ардагерлер қоғамының мүшесі болып, ел өміріне белсене араласқан көрнекті мемлекет және қоғам қайраткері. Мұны тізбелеп отырғанымыз ол өзінің жазбаларында ойдан ештеңе қоспаған, өзі көрген, куә болған тарихи тұлғалар мен тарихи оқиғаларды қаз-қалпында ойға қонымды, ақылға сыйымды етіп байсалды баяндап берген. Сонысымен де бұл еңбек құнды. Әлемдік деңгейдегі аса көрнекті саясаткер Қасым-Жомарт Кемелұлы Тоқаев 2003 жылы жарық көрген «Өмір мен тағдыр» атты кітабында былай деп жазды: «Әкемнің Жоғары Кеңес Президуимындағы көп жылғы жұмысы туралы айтқанда, Бижамал Рамазанова туралы айтпай кету мүмкін емес. 12 жылдан астам республиканың мемлекеттік билігін көрсететін осы өте маңызды органда екінші тұлға болды. Б.Рамазанова – аса білікті басшы, еңбекқорлығымен, сыпайылығымен әріптестеріне деген достық ниетімен ерекшеленді. Оның Жоғарғы Кеңес Президиумының хатшысы қызметінен кетіп, Қазақ КСР Министрлер Кеңесі жанындағы Бас архив басқармасына басшы болып тағайындалуы республика билігі үшін кемшін болды. Ол Қазақстандық парламентаризм тарихына жарқын тұлға болып енді».
Мемлекет басшысының тап басып, тамаша айтқан сөзіне алып, қосарымыз жоқ.
Тобықтай сөздің түйіні – Бижамал Рамазанованың тоқсан жастың төрінен төменге, өткенге көз жібере тұрып айтқан мағыналы сөзі жасқа да, жасамысқа да ой салатын тәрбиелік мәні зор, айтары анық, бояуы қанық уақытпен бірге жасай беретін аса бағалы еңбек.
Сәбит ДОСАНОВ,
жазушы, Мемлекеттік сыйлықтың лауреаты