Бүгінде билік пен бұқара арасындағы диалогтың діңгегі болатын Ұлттық қоғамдық сенім кеңесінің бағыты айқындалып, жұмысы біршама жүйеленді. Жақында Мемлекет басшысы Қасым-Жомарт Тоқаевтың Жарлығымен Кеңестің ережесі мен құрамы бекітілді. Мәртебесі Қазақстан Республикасының Президенті жанындағы консультативтік-кеңесші орган болып нақтыланған Кеңестің негізгі міндеті – тұжырымдамалардың, мемлекеттік бағдарламалар мен нормативтік-құқықтық актілердің жобаларына қоғамдық сараптама жүргізу, жұртшылықтың, азаматтық қоғамның пікірін ескере отырып, маңызды стратегиялық проблемаларды қарау, тараптар арасында сындарлы диалогты қамтамасыз ету.
Құрамы 44 адамнан жасақталған Ұлттық кеңеске Президенттің өзі төрағалық етеді. Бұл аталған кеңеске деген көпшіліктің сенімін арттыра түсті. Өйткені Мемлекет басшысы сайлауалды тұғырнамасында ашық және әділ жұмысты ілгерілетуге ерекше мән беріп, кеңес атқарушы билік пен қоғам арасындағы алшақтықты қысқартатын көпір болатынын айтқан. Президент халықты толғандырып отырған басты мәселе табыс көлемінің азаюы екенін, басқа да өзекті мәселелерді айқын көріп отырғанын мәлімдеді. Бұл ойын кейін шетелдік танымал бұқаралық ақпарат құралдарына берген сұхбаттарында қуаттады. Енді жаңадан құрылған Кеңес арқылы Мемлекет басшысының тікелей қадағалауымен талай мәселенің басы ашылып, шиеленіскен жағдайлардың шешімі қарастырылады. Ол үшін кеңеске мүше болған халықтың сөзін сөйлей алатын, үнін жеткізе алатын қоғам белсенділері өз мүмкіндіктерін барынша пайдалану керек. Кеңес құрамына осы уақытқа дейін жұртты толғандырған мәселелерді ұдайы көтеріп жүрген, көпшіліктің сеніміне ие болған азаматтар кірді. Президент Әкімшілігі өкілдері түрлі қоғам қайраткерлерімен, саясаткерлермен, сарапшылармен, азаматтық сектор өкілдерімен кездесу өткізіп, тиісті консультациялардың нәтижесінде Кеңестің мүшелерін іріктеді.
Кеңес құрамының нақтылануымен халыққа бұл диалог алаңында көтерілетін мәселелер мен ұсыныстардың бірсыпырасы мәлім болып қалды. Себебі Кеңес мүшелерінің көбінің қозғап жүрген проблемаларынан жұрт хабардар. Ол азаматтар Ұлттық кеңес құрамы бекітілген Жарлық шыққаннан кейін де баспасөз беттерінде және әлеуметтік желілер арқылы бұрын да айтып жүрген тақырыптарын аталған алқалы топтың ортасына салатындарын жеткізді. Бұған қоса Кеңес мүшелерінің қатысуымен бірлі-жарым басқосулар да ұйымдастырылды. Үн қатқан қоғам белсенділерінің мәлімдемелерінен Кеңесте талқыланатын мәселелер мен ұсыныстар бірнеше тақырыптарды қамтитынын байқауға болады. Мәселен, Кеңес мүшесі, Ұлттық «Серпін» білім және инновациялар палатасының президенті Мұрат Әбенов: «Білім саласы, медицинаны көтеру, жастардың проблемасы сияқты мәселелерді жиі көтеретінін айтып, осы бірқатар әлеуметтік саладағы жағдайлардың реттелуі үшін ұтымды ұсыныстар жасауға тырысатынын жеткізді.
Ал тағы бір кеңес мүшесі, Қазақстан Ұлттық архивінің «Архив-2025» ғылыми-әдістемелік орталығының басшысы Берік Әбдіғалиұлы: «Менің ойымша, бұл кеңес Президент жанындағы консультативті-кеңесші орган ретінде саяси реформалар, әлеуметтік, экономикалық жағдайларға қатысты қажетті әрі еліміздің дамуына маңызды ұсыныстар беріп отырады. Жеке өзім руханият, ұлттың дамуы, жергілікті мемлекеттік басқару, оның ішінде ауыл мәселесі, әкімдердің жұмысы, өңірлік саясатпен байланысты тәжірибем мен ұсыныстарымды бөлісемін деп ойлаймын», деп пікірін білдірді.
Сондай-ақ кеңес мүшесі, Кәсіподақтар федерациясы төрағасының орынбасары Ерлан Саиров сайлау, митинг, БАҚ және саяси партиялар туралы заңдардың кейбір тармақтары заман талабына сай емес екенін айтады. Бұған қоса ол Қазақстаннан өз еркімен көшіп жатқандардың саны көбейіп жатқанына көңіл аударып: «Мені мазалайтын сұрақтардың бірі – шекара жағдайы. Шығыстағы Катонқарағай, Марқакөл, Ақсуат, Мақаншы өңірлерінен халық үдере көшіп жатыр. Мысалы, бұрынғы Марқакөл ауданында осыдан 30 жыл бұрын 27 мың адам тұрған. Қазір аудандағы тұрғындардың саны – 6 мыңға жетер-жетпес. Мұны гуманитарлық проблема деп те атауға болады. Дәл осындай жағдай Алматы облысында да бар. Бұл мәселені шешу үшін кезінде қысқарып қалған аудандарды қайта құру қажет. Содан кейін шекаралық аймақтарды дамыту жөніндегі мемлекеттік бағдарлама жасау керек» деген ойын жеткізді.
Сонымен қатар Ұлттық кеңесте жер мәселесі де қаралады. Бұл туралы Премьер-Министрдің орынбасары Жеңіс Қасымбек Үкіметте мәлімдеп, аталған мәселені қоғаммен талқылау үшін өңірлерге сапарлау кестесі бекітілгенін, жыл соңына қарай Ұлттық кеңеске ұсынылатынын айтты. Ауыл шаруашылығы жерлерін сату және жалға беру, мораторий мәселесі әлеуметтік желілерде де кеңінен талқылана бастады. Бұл жағдайды Ұлттық кеңес отырысында көтеруді бірнеше азамат әлеуметтік желілерде кеңеске мүше болған қоғам белсенділерінен сұрады. Осы тұрғыда Президент кеңесшісі Ерлан Қарин кезіндегі Жер комиссиясына қарағанда Ұлттық қоғамдық сенім кеңесі әлдеқайда ауқымды екенін, бұл диалог алаңында бір емес, бірнеше ұлттық мәселелер талқыланатынын айтты.
Осылайша кеңестің қалған мүшелері де өздерінің саласындағы олқылықтарды көтеріп, түрлі мәселелердің кеңінен қозғалуына септігін тигізуде. Сондықтан Жарлықпен бекітілген Ұлттық қоғамдық сенім кеңесінің ережесінде қоғам дамуының жекелеген салалары бойынша жұмыс топтары құрылуы мүмкін екені көрсетілген. Бұл кеңес жұмысындағы айтылатын проблемалар мен ұсыныстарды жүйе-жүйесімен реттеуге, содан соң ортақ шешім шығаруға мүмкіндік береді. Жұмыс топтарының қалай жіктелетіні туралы кейінірек белгілі болады.