Индустрия және инфрақұрылымдық даму министрлігі Индустриялық даму және өнеркәсіптік қауіпсіздік комитетінің төрағасы Қанат Баитов ішкі жалпы өнімнің шамамен 6,7%-ы тау-кен металлургия кешеніне тиесілі екенін, сондай-ақ өнеркәсіптік өндірістің 25%-ын, экспорттың 24%-ын осы сала алып жатқанын айтты. Бүгінде саладағы кәсіпорындардың саны 800-ден асып, 185 мың адам жұмыспен қамтылған. Комитет төрағасы соңғы 10 жылда индустрияландыру бағдарламасы арқылы тау-кен металлургия кешенінде 114 жоба іске қосылғанын жеткізді.
– 2015-2019 жылдар аралығында елімізде төртінші өнеркәсіптік революция талаптарына сай келетін жаңа қондырғылармен жарақталған заманауи тау-кен металлургия кешендері іске қосылды. Жуырда ғана YDD ферроқорытпасын өндіретін автоматтандырылған зауыт жұмыс істей бастады. Оның өндірістік қуаты жылына 180 мың тонна. 2021 жылға қарай бұл көлемді 240 мыңға ұлғайту жоспарланған. Ерекшелігі сол, өндірісте жаңа технологиялар қолданылады. Атап айтқанда, көмірдің орнын электр энергиясы алмастырған. Бұл атмосфераға тарайтын зиянды қалдықтарды азайтуға септесіп отыр, – деді Қанат Баитов.
Мекеме өкілі 2025 жылға дейін кен өндіру және өңдеу өнеркәсібін цифрландыру шеңберінде 1,7 трлн теңге сомасына 192 жобаны жүзеге асыру жоспарланғанынан хабардар етті. Оның экономикалық пайдасы 2, 2 трлн теңгені құрайды деп күтілуде.
Ал «Қазмырыш» кәсіпорыны цифрландырудың тиімділігін арттыру үшін арнайы жол картасын әзірлеп, оған 7 жоба енгізді. Шығыстағы алпауыт компания әсіресе жасанды интеллектіге ерекше ден қоймақ. Осы арқылы еңбек өнімділігін ұлғайтып, жаңа мамандардың буынын қалыптастыру мақсаты қойылған.
– Big data – яғни үлкен деректі басқаруды енгізу қарқын алып, негізгі кезеңге келді. Бұл жоба өндірісті ілгерілетумен қатар, экономикалық модельге оң әсер беруі тиіс. Ең бастысы, барлық шаруаны бір орталықтан басқарып, шешуге көмектесетініне сенімдіміз. Тағы бір ауқымды инновациялық жобамыз – өзін-өзі оқыту жүйесіне негізделген жасанды интеллектімен байланысты зауыттың іске қосылуы. Индустрия 4.0-ді негізге алсақ, ойымызға бірден киберфизикалық жүйелер оралады. Қарапайым тілмен айтқанда, жаңа технологиялар операторға үлкен көлемдегі деректерді игеруге ықпал етуге тиіс, – дейді «Қазцинк» ЖШС бас директорының цифрлы трансформация бойынша кеңесшісі Максим Гайфулин.
Дегенмен бұл салада да шешілмеген мәселелер бар дейді спикерлер. Бұл бірінші кезекте білікті мамандардың тапшылығына қатысты. Қазір елдегі ауыр өндіріс орындарында саланы жетік білетін IT-мамандар тапшы.