Мұнайлы аймақтың мүмкіндіктері мол

Қоғамдық диалог – түсіністік кепілі

Мемлекет басшысының Жол­­дауында халықпен тиімді кері байланыс орнатуға айрықша мән берілген. «Қоғамдық диалог, ашықтық, адамдардың мұң-мұқтажына жедел назар ауда­ру мемлекеттік органдар қыз­метінің негізгі басым­дық­тары саналады», – деп атап көр­сет­ті Қасым-Жомарт Тоқаев. Мұнайлы аймақта тұрғындармен бай­ланыстың түрлі әдістері қол­да­нылады. Мысалы, барлық мем­лекеттік органдардың басшы­ла­ры тіркелген Атырау облысы әкімдігінің Telegram чатында 10 мыңнан астам қолданушы бар. Екі жылдан бері чат-каналға 6500 сауал түсіп, бәріне жауап берілді. Сондай-ақ әлеуметтік желілерде байланысқа шығу, ашық есік күні, брифингтер мен тікелей эфирлер өткізу дәстүрге айналды.

Актив жиынында үкіметтік емес секторды дамыту ең ма­ңыз­ды басымдылық екеніне тоқ­талған аймақ басшысы өзек­ті мәселелер бойынша нақ­ты негізделген ұсыныстар жа­с­ап, енгізуді ұсынды. Мы­са­лы, Ре­сей Федерациясы Та­тарс­тан Рес­публикасының Қазан қала­сын­да билік органда­ры мен қоғамдық ұйымдар бір­ле­сіп, табысты жұмыс істеп жатыр. Жақында Татарстан Пре­зи­ден­тінің кеңесшісі Наталья Фиш­ман тәжірибе алмасу үшін Аты­рау­ға келеді.

Мемлекет басшысы 2020 жылды «Волонтер жылы» деп жариялады. Азаматтық қоғам­ды нығайтуға бағытталған жұ­мыс­тар­ға ерекше маңыз берілмек. «Ерікті болып та елге қызмет етесіз», – деген Арман Қасымов 2008 жылдан бері облыстық же­дел жәрдем стансасында ерікті ретінде жұмыс істеп келе жат­қанын айтты. «Дәрігерді сына­ған­нан мәселе шешілмейді. Сол себепті бос уақытымда жедел жәр­дем қызметінің жұмысын жақ­­сартуға сәл де болса үлесімді қос­­­қым келді», деді ерікті А.Қасымов.

Экономиканы әртараптандыру –  басты назарда

Соңғы үш жылда жалпы өңірлік өнім көлемі 5 200,7 млрд теңгеден 7 894,5 млрд теңгеге дейін өсті. Республиканың ішкі жалпы өніміндегі Атыраудың үлесі 15,6%. Мемлекеттік бюджетке кіріс түсімдері бойынша да мұнайлы аймақ алдыңғы қатарда. Өткен жылдың өзінде бұл көрсеткіш 1 388 млрд теңге­ге жетті. Ал ұлттық қорға тү­сім­­­дер бойынша еліміздегі бар­лық соманың 50%-ға жуығы Атыраудың еншісінде. Бұл деректер мемлекет қазынасының басты донорларының біріне айнал­ған аймақта атқарылып жат­қан жұмыстардың оң ба­ғыт­та екенін айқындайды. «Мұнай-газ саласының маңызын ешкім жоққа шығармайды. Бірақ ша­ғын және орта бизнесті да­мыту, өңір экономикасын әртарап­тан­ды­ру, әсіресе шикізат өн­діруден тыс салаларды дамыту жайы да назарда болуы тиіс», деді Нұрлан Ноғаев. Қазір облыста 48 281 шағын және орта бизнес субъектісі жұмыс істейді, бұл өткен жылдың сәйкес кезе­ңі­мен салыстырғанда 106%-ға көп. Президент Жолдауында айтыл­ған 2020 жылдан бас­тап орта және шағын бизнес саласындағы ком­панияларды үш жылға дейін табыс салығынан босатып, тексеріс жүргізуге тыйым салу – бизнес иелеріне үлкен қолдау болмақ. Мұны көп балалы ана, кә­сіпкер Фатима Тулеева да қуат­тады. «Төрт жыл бұрын жиһаз сататын орын аштық, мей­рамхана бизнесін бастадық. Қа­зір 83 адамды жұмыспен қамтып отырмыз. Президенттің Жолдауда кәсіпкерлікті дамыту ту­ралы берген тапсырмалары ертеңгі күнге деген сенімімізді ны­ғайтты», деді.

Аймақ басшысы 2019-2024 жылдары әр салада жалпы құны 1,4 трлн теңгенің 11 жобасы іске асырылатынын, 2 200-ден астам адам жұмыспен қамтылатынын атап өтті.

Жолдауда айтылған жақсы жаңалықтың бірі – жаңа жылдан бастап шағын және орта бизнестен түсетін қосымша са­лық­тық түсімдер өңірлердің құ­зы­рына беріледі. Бұдан Атырау облысының бюджетіне 29,4 млрд теңге түседі деп болжануда. Облыс әкімі осындай мүм­кіндікті өңірді дамытуға не­ғұр­лым тиімді пайдалану қажет еке­нін айтты.

Қалада құрылыс қарқынды,  ауылда – жаңа жобалар

Облыс орталығының бас жос­­парына сәйкес 2030 жылға дейін тұрғын үй қоры 10,5 млн шаршы метрге жетеді. Жыл өткен сайын Атырау қа­ла­­сының аумағы ұлғайып ке­ле­ді. Жаңа шағын аудандар бой көтеріп жатыр. Жолдауда: «Не­гізгі қағидат – тұрғындар, әсіресе әлеуметтік тұрғыдан әлсіз топтар үшін баспананың қол­жетімділігін арттыру» екені айтыл­ған. Мұнайлы аймақта бұл бағыттағы жұмыстар да жалға­сын табады. «Нұрлы жер», «7-20-25», «Бақытты отбасы» бағдарламаларына қы­зы­ғушылық танытқан аты­раулықтар көп. Облыс әкім­ді­гі тарапынан «7-20-25» бағ­дар­ламасы аясында ипотека бойынша бастапқы жарналарды жар­тылай субсидиялаудың тетік­терін іске қосу негізінде жер­гілікті бюджет есебінен бастапқы жарнаны әлеуметтік қолдау үшін 1 млрд теңге қарастырылды.

Жиында сөз алған Индер ауданының әкімі Мейі­рім Қалауи «Ауыл – ел бесігі» бағ­дарламасының қар­жы­лан­ды­ру көлемін 3 есеге арттыру жөніндегі Президент тапсырмасы шалғайдағы елді мекендердің ахуалын көтеруге мүмкіндік беретінін айтты. «Қазіргі таңда ауылдарда жаңа жұмыс күшін құру міндеті тұр. Бұл – экономикалық белсенді халқының жартысынан көбі вахталық әдіспен жұмыс істей­тін Индер ауданында да өте маңызды мәселе. Ауданның жер­асты қазба байлықтарын, ауыл шаруашылығына, логистика мен туризмге қолайлы жерін пайдалана отырып, кәсіпкерлікті дамытуды қолға алдық. Тұз зауытын кеңейту жұмыстары басталды. Жыл соңына дейін 150-ге жуық жаңа жұмыс орны ашылатын нысанға жергілікті жастарды тартқымыз келеді. Туризмді дамыту үшін Тұздыкөлде шипажай, қонақүй салу жоспары бар. Белоруссиялық инвес­торлармен цемент өндірісін қолға алу жөнінде келіссөздер жүргізілуде», деді аудан әкімі.

Жолдауда көрсетілген басқа да міндеттер, денсаулық сақтау, білім беру, жұмыспен қамту жайы да жиында талқыға түсті. Әлеуметтік қолдау жүйесін одан әрі дамыту мәселесіне тоқталған облыс әкімі жұмысты нақты қажеттіліктерге бағыттауды тап­сыр­ды. «Мемлекеттік қолдау масылдық пиғыл туындатпауы керек. Мемлекет те шын мәнінде мұқтаж жандарға кө­мек­­­тесуі тиіс, ал еңбекке қабі­летті адамдар жұмыс істеуі қажет. Президентіміздің Жол­да­уы жақын болашақтағы ба­сым­дықтарды айқындап берді, деді Нұрлан Ноғаев. – Аты­рау өңірінде қай бағытта қалай жұмыс істеуіміз керек, қандай міндеттер тұр, анық бағдар бар. Мүмкіндіктер мен ресурстар да бар. Тек бәріміз бірге жұмылып, қажырлы еңбек етсек қана алға қойған мақсаттарымызға жетеміз».

АТЫРАУ