Ел болашағы үшін бүгінде іске асып жатқан бастамалардың саны өте көп. Солардың ішіндегі ең мүдделісі әрі қуаттысына тоқталсақ, білім-ғылымға деген әлемнің қойған талабы да жоғары, халықтың ынтасы да биік. Соны ескерген Елбасы елордада еліміздің ұлттық брэндіне айналуға тиіс оқу ордаларына үлкен сеніммен қарайды десек, жуырда осы қатарға Астананың жаңа университеті қосылмақ. Ел дамуының индустрия-инновациялық деңгейіне зор үлес қосатын мұндай университет бүгінде өзінің миссиясын нақты жүзеге асыруға кірісіп кетті.
Астана қаласында құрылған осынау халықаралық университет қызметіне байланысты елорданың “Редиссон” қонақүйінің Сарыарқа залында баспасөз мәслихаты болып өтті. Бұған “Астананың жаңа университеті” АҚ вице-президенті Қадиша Даирова, Results for Development Іnstіtute-нің басшысы, Орталық Азиядағы Дүниежүзілік Банк өкілдігінің бұрынғы директоры Деннис де Трей, Орталық Азия және Кавказ институтының төрағасы, Пол Ницше атындағы Джонс Хопкинс университетінің Озық халықаралық зерттеулер мектебінің профессоры Фредерик Старр мен Ғарышты зерттеу институтының құрметті директоры Роальд Сагдеев және Делойтт компаниясының атқарушы департаментінің басқарушы серіктесі Дэррил Хадауей, Энергетикалық технологиялардың есептеу физикасы мен гидродинамика бөлімшесінің қызметкері Зинетулла Инсепов сынды оқымыстылар, ғылыми және іскерлік қоғам өкілдері қатысты. Астананың жаңа университетінің даму стратегиясы баспасөз мәслихатының негізгі тақырыптық өзегіне айналды.
Баспасөз мәслихаты барысында вице-президент Қ.Даирова университеттің қалыптасуының бірінші жылдарында халықаралық тәжірибені зерттеу және қолдау үшін халықаралық консультативтік кеңестің құрылғанын атап өтті. Ол сондай-ақ Астананың жаңа университеті бакалавриатының бірінші базалық курсы – Foundatіon бағдарламасына студенттерді қабылдау жүргізілетіндігі туралы, оған түсу тәртібі шетелдік серіктес Лондонның университеттік колледжімен белгіленгендігі жөнінде және аталмыш оқу орны ағымдағы жылдың жазында ашылатындығын тілге тиек етті.
Ал Жаңа университеттің оқыту үрдісі туралы Орталық Азия және Кавказ институтының төрағасы, Пол Ницше атындағы Джонс Хопкинс университетінің Озық халықаралық зерттеулер мектебінің профессоры Фредерик Старр: “Бұл университет халықаралық жоғары оқу орындарымен серіктестік негізде құрылғалы отыр. Алайда, бұл түбегейлі қазақ ғалымдары, профессорлары тыс қалып қойды дегенді білдірмейді. Керісінше, жаңа университетке шетелде білім алып, қазіргі уақытта сол жақта дәріс оқып жүрген ең үздік, қабілетті, жас қазақ ғалымдары тартылады. Олар белгілі бір уақыт аралығында Қазақстанға оралып, оның ғылыми өміріне белсене араласады. Менің пікірімше, бұл шетелдік және жергілікті ғалымдардың, профессорлардың бірлескен кәсіпорны. Сонымен қатар, бұл қазақ халқының, қазақ педагогтарының күш-қуатымен ғасырдан ғасырға ұласатын кәсіпорын” – дей келе осы университеттің әлемнің үздік 30 университетінің қатарына енуі тиіс екендігін атап өтті.
Мемлекет басшысының тікелей бастамасымен ашылғалы отырған жаңа университеттің 2010 жылға арналған оқуға қабылдау шарасы 3 кезеңге бөлінетін болады. Алғашқы кезеңі наурыз айынан бері басталған болса, бір айға дейін жалғасатын қабылдау мерзімі ішінде 1500-ге жуық студенттер құжат тапсырып, тілдік сынақтардан өтеді. Ал екінші кезеңі мамырда, үшінші кезең маусым айынан бастап қыркүйек айына дейін жалғасады.
Арай ҮЙРЕНІШБЕКҚЫЗЫ.