Қайырымдылық жасау – қазақ халқының бойында сан ғасырлар бойы қалыптасқан ұлы қасиеттердің бірі. Қоғамдағы түрлі тағдыр иелеріне қолұшын созып, көмек көрсету де – адамгершіліктің белгісі. Бұл орайда жетім және ата-анасының қамқорлығынсыз қалған балаларды әлеуметтік тұрғыда қолдау мақсатында осыдан он жыл бұрын Шығыс Қазақстан және Ақтөбе облыстарында «Мейірім» жобасы жүзеге асқан болатын. Енді аталған жоба Жамбыл облысының әкімі Бердібек Сапарбаевтың бастамасымен Әулиеата өңірінде де жалғасын тапты. Бұл жоба алдыңғы екі облыста да өзінің тиімділігін көрсетті.
Жобаны Жамбыл өңірінде де тиімді жүзеге асыру мақсатында М.Х.Дулати атындағы Тараз мемлекеттік өңірлік университетінің М.Үркімбаев атындағы Жастар сарайында жиын өтіп, аталған жобаның тұсауы кесілді. Салтанатты жиынға облыс әкімі Бердібек Сапарбаев, облыс әкімінің орынбасары Ержан Жылқыбаев, облыстық мәслихаттың хатшысы Бағлан Қарашолақов және әкімдікке қарасты басқармалар мен өзге де мекемелердің басшылары қатысты. Аталған шара Тараз қаласындағы «Мейірімділік мекені» атты балалар әлемінің тәрбиеленушілері туралы дайындалған бейнероликпен ашылды. Мұнда балалардың күнделікті тұрмыс-тіршілігі қамтылып, ата-ананың мейірімін аңсап өсіп келе жатқан жеткіншектерді қамқорлығына алып отырған орталықтың жұмысы таныстырылды. Бұдан кейін облыс әкімі Б.Сапарбаев сөз алып, қамқорлыққа мұқтаж азаматтарға қолұшын созып, көмек көрсету атаның қанымен, ананың сүтімен бойымызға сіңген қасиет екенін атап өтті. «Жалпы, адам баласы қаншалықты бір-біріне мейірбан, қамқор болса, ол да қоғамның ізгілене түсуіне қосқан үлесі, азаматтық борышының орындалуы деп білемін. Қазақ – жетімін жылатпаған, жесірін қаңғытпаған халық. Оны өз тарихымыздан жақсы білеміз. Мәселен, қазақ өткен ғасырдың басындағы ашаршылық пен қуғын-сүргін уақытында елімізге қоныс аударған қаншама өзге ұлт өкілдерін туысынан кем көрмей, бауырына басты. Бұл бізге үлкен өнеге болды. Сондықтан да мұқтаж жандарға көмек беруді аймақтағы кәсіпорын басқарып, өз кәсібімен айналысып отырған атпал азаматтардың бір міндеті деп білу қажет. Бұл – әркімнің өскелең ұрпақ алдындағы әлеуметтік парызының орындалуы деп ойлаймын. Қазір аймақта жұмыс істеп жатқан бірқатар өнеркәсіп орындарының облыс тұрғындарына жан-жақты көмек беріп жатқанынан хабардармыз. Ендігі кезекте бұл жұмыстар жалғасын табуы үшін аталған жобаны іске қосқалы отырмыз. Елімізде әлеуметтік ахуал жақсарған сайын балалар үйі тәрбиеленушілерінің саны азайып келеді. Дегенмен ата-анасының қамқорлығынсыз қалған балақайлар әлі де бар. Біздің міндетіміз – оларға барынша қолдау көрсетіп, қоғамның толыққанды мүшесі атанып, еліне адал қызмет ететін азамат болып өсуіне, өмірден өз орнын табуына жәрдемдесу», деді әкім. Сонымен қатар өз сөзінде Б.Сапарбаев осылайша жетімдер үйінің тәрбиеленушілеріне сапалы білім алып, мамандық иесі атануға, жұмысқа орналасуға, баспаналы болып, отбасын құруға қолдау білдіру қажеттігін айтып өтті.
Жоба тұжырымдамасына сәйкес, өңірдегі жетім және ата-анасының қамқорлығынсыз қалған балаларға арналған мекемелерде тәрбиеленіп жатқан, яғни асыраушысынан айрылған 134 баланың өмір сүру сапасын әлеуметтік және құқықтық кепілдіктерді қамтамасыз ету арқылы жақсартуға бағытталған жұмыстар жүргізіледі. Бұл мақсатта 87 мемлекеттік мекеме мен ірі кәсіпорындардың басшылары жауапты тұлға есебінде бекітілген. Тиісті азаматтар сол балалар өсіп, үлкен өмірге араласқанша олардың ашылған есепшоттарына қаржы салып, өзге де мәселелер бойынша қолдау көрсетеді. Сондай-ақ олардың кейіннен тұрақты жұмысқа орналасып, баспаналы болуын да бақылауға алады.
Жиын барысында балалар үйінің тәрбиеленушісі Альбина Қадырова өзі секілді балдырғандарды қамқорлығына алғаны үшін Б.Сапарбаевқа алғыс айтты. «Мен 6-сыныпта оқимын. Оқу үлгерімім жақсы. Болашақта оқу грантын иеленіп, өзім армандаған мамандықтың иесі атансам деймін. Үлкен үйім болса деп армандаймын. Бүгін сол арманыма бір табан жақындаған сияқтымын. Облыс əкімінің қолынан қаржылай сертификат алғаныма қуанып тұрмын», дейді А.Қадырова.
Бұдан кейін Б.Сапарбаев А.Қадыроваға 1 млн теңгенің сертификатын табыстады. Бұл оның «Тұрғын үй құрылыс жинақ банкі» арқылы баспана алуы үшін бастапқы жарна ретінде төленіп отырған қаражат. Сондай-ақ балаларды өмірлік сүйемелдеу туралы үшжақты әлеуметтік келісімшартқа қол қойды.
Жамбыл жерінде жүзеге асып жатқан «Мейірім» жобасына жергілікті кәсіпкерлер де қолдау көрсетті. «Қазфосфат» ЖШС бас директоры, Қазақстанның Еңбек Ері Мұқаш Ескендіров Данил Котурбаев пен Татьяна Шевелеваға, облыстық мәслихаттың хатшысы Бағлан Қарашолақов Аркадий Овчинниковқа, ал, «Altais Group» ЖШС директоры Әлімбек Жұмабаев Николай Морозовқа, «Арайстроймаркет-2003» ЖШС директоры Арман Еділбаев Виктория Онищенкоға 1 млн теңге көлеміндегі сертификаттар табыстады. Бұдан кейін көпшілікке балалар үйіндегі жеткіншектерге көмек көрсетіп жүрген жамбылдық жомарт жандар туралы дайындалған бейнеролик көрсетілді. Сондай-ақ «Өмірлік қиын жағдайдағы балаларды қолдау орталығы» мекемесінің басшысы Айжан Мейірханова баянды бастаманы Жамбыл жерінде жалғастырғаны үшін облыс әкімі Б.Сапарбаевқа алғыс айтты. Сонымен қатар балаларға жәрдем беріп, жүрек жылуын төккен барша азаматтарға игі тілегін арнады. Шара соңында балалар үйінің тәрбиеленушілері де көмек көрсеткен жандарға деген алғысын әнмен жеткізді.
Жамбыл облысы