БҰҰ волонтерлері қатарын толықтырды

БҰҰ құрылымдарына қо­сыл­ған жастар тұрақты даму саласында өз біліктіліктерін арт­тырып, білімдерін шың­дай түседі. Оған қоса өз тәжі­рибесімен бөлісіп, волон­тер­ліктің дамуына үлес қоса алады. Жастардың барлық шы­ғыны мемлекет тарапынан өтеледі.

БҰҰ Волонтерлердің Еуро­па және Орталық Азия­дағы аймақтық менеджері Дми­трий Фришин жастардың әлем­дік алаңда тәжірибе алма­суына Қазақстанның Ақ­парат және қоғамдық даму министрлігінің қолдау біл­дір­генін мәлімдеді. «Қазақ­стандық жастар БҰҰ құры­лым­дарында жұмы­сын бастады. Талантты өрендер тұрақты даму жолында инновациялық идеяларымен бөлісіп, төтенше жағдайларды шешу сияқты міндеттер атқарады. Конкурс негізінде іріктеліп алынған волонтерлер өз елдерінің тә­жірибесін халықаралық аре­наға жеткізумен қоса, Қа­зақстан мен басқа елдер арасында байланыс орнатуға мүм­кіндік алады. Сонымен бір­ге әлемде бейбітшілік пен дамуды қамтамасыз ету мақ­сатында халықаралық волонтерлікті қолдаумен айна­лысады», дейді маман.

Конкурс талаптары­ бо­йынша БҰҰ волонтерлер қатарына 18 бен 29 жас аралы­ғындағы азаматтар таңдалды. Бұған дейін волонтерлікпен айналысқан, өзге елдің мә­дениеті мен тілін сыйлайтын, халықаралық қатынас, даму саласында білімі бар, БҰҰ жүйесімен таныс жастарға басымдық берілді.

Халықаралық ұйымға тәжірибе жинауға кеткен Ме­р­уерт Сыздықбекова бүгінде БҰҰ-ның «БҰҰ Әйелдер» ай­­­мақтық офисінің қоршаған ор­­та және климаттың өзгеруі бойын­ша маманы болып қыз­мет атқарады. «Мен БҰҰ-ның  волонтері болу тұлғалық да­­­муым үшін де, кәсіби тұр­­ғыда дамуым үшін де пай­далы деп білемін. Мол тә­жірибе жинап, өз саламда пай­далы байланыс орнатуға мүмкіндік туып тұр. Оған қоса бұл – шетелдіктерден олар­дың мәдениеті туралы танымымды кеңейтіп, әлем елдерін аралауға қо­лайлы сәт. Университет қа­быр­ғасында студенттер­мен «БҰҰ Моделін» ұйым­дас­тырып, оқу орнында БҰҰ Бас Ассамблеясы мен Қа­уіпсіздік Кеңесінің жұ­мы­­сын қайталағандай бола­тын­быз. Сол кезде келешек­те шынымен БҰҰ сынды маңызды халықаралық ұйым­ның мүшесі болатыным ойыма келмейтін де. Бұл бағ­дарлама аясында тұрақты даму саласындағы озық тәжі­рибелерді үйреніп, туған елі­ме, барлық әлемге пайдалы бо­латын еңбек сіңіремін деген сенімім бар», дейді.

БҰҰ-дағы Қазақстанның тұрақты өкілі Қайрат Ома­ров жастар бұл саладағы тә­жірибелі мамандардан үй­реніп, елдегі волонтерлікті дамытуға үлкен үлес қосады деген сенімін жеткізді. «Не­гізінен, Қазақстандағы волон­терліктің тамыры тереңде. Қазақстан БҰҰ-мен бірлесіп бейбітшілік пен мейірімді дәріптеуге күш салып ке­леді. 2019 жылы Қазақстан Үкіметінің БҰҰ Волонтерлер бағдарламасымен келісімшарт жасауы бұған жақсы дәлел. Бұл бастама нәтижесінде 7 қа­зақстандық халықаралық волонтерлікпен айналысып, әлемдік тәжірибені елге алып келу мүмкіндігіне ие болып отыр», деді Қ.Омаров.

Замандастарынан  оқ бойы озып шығып, халықаралық волонтерлікке Қазақстан аты­нан үлес қосатындарға тоқ­талсақ. Иордания астанасы Амманға аттанған отанда­сымыз Айнұр Канафина Дү­ниежүзі денсаулық сақтау ұйы­мында саясат мәселелері бойынша кеңесші болып қыз­мет етеді. Банг­кокқа кеткен Фариза Мұ­қа­но­ва Халықаралық миграция ұйымының Еңбек мигра­циясын қолдау бөлімінде қыз­мет атқарады. Меруерт Сыз­дық­бекова – «БҰҰ Әйелдер» қорында қоршаған орта мен климаттың өзгеруі бойынша маман. Ол қазір Түркияның Ыстанбұл қаласында тұрады. ЮНИСЕФ ұйымына екі бір­дей отандасымыз аттанды. Ұйымның Найробидегі (Кения) бөлімінде жұмысқа кіріскен Гүлмира Түсіпбекова мек­тепке дейінгі білім беру бөлімінде біліктілігін шың­дайды. Ал Дильшат Жүсіпова ЮНИСЕФ-тің Бангкоктағы бөлімшесіне коммуникация маманы болып жұмысқа тұрды. БҰҰ-ның даму жө­ніндегі бағдарламасы да екі қазақстандықпен толықты. Дина Ақылбекова мен Диана Дүйсембаева Ыстанбұлда серік­тестікті қолдау бойын­ша тәжірибеден өтпек. Ал­дағы уақытта халықаралық ұйымдарда білімін сынап, тәжірибеден өтіп жатқан отандастарымызбен сұхбат ұсыну ойымызда бар.